ڈیل چھوٹا لفظ ہے، پروجیکٹ نوازشریف میں شہبازشریف اور اسحاق ڈار ہینڈلرز ہیں

پاکستان پیپلز پارٹی کے سینئر رہنما ندیم افضل چن نے کہا ہے کہ پروجیکٹ نوازشریف میں شہبازشریف اور اسحاق ڈار ہینڈلرز ہیں۔ نواز شریف کی واپسی ایک پروجیکٹ ہے، اس کیلئے ڈیل چھوٹا لفظ ہے۔ ندیم افضل چن نے ایک انٹرویو کے دوران کہا ہے کہ بروجیکٹ نواز شریف کی وجہ سے نوازشریف بڑھاپے میں سرخرو نہیں ہو سکیں گے، جب آپ بازو مروڑ پالیسی کے تحت آئیں تو پھر آپ کو سلیکٹڈ ہی کہا جائے گا۔

رہنما پیپلز پارٹی نے کہا کہ نگران حکومت تو مسلم لیگ ن کی ہی ہے کیوں کہ جب کوئی لاڈ اور پروٹوکول میں ہوتا ہے تو سب قانون اس کے ہی ہوتے ہیں اور نواز شریف اس وقت ووٹ کی عزت سے دوبارہ ضیاء الحق کی طرف آگئے ہیں اور لاڈلے ہیں۔

ندیم افضل چن نے انٹرویو کے دوران مزید کہا کہ میاں نواز شریف کی ڈیل میں شہباز شریف اور اسحاق ڈار ہینڈلرز ہیں اور شہباز شریف اس ڈیل کے گارنٹر بھی ہیں لیکن نواز شریف الیکشن کے بعد اپنے سابقہ اعلان کے مطابق حساب کتاب کریں گے کیوں کہ فطرت نہیں بدل سکتی ہے۔