حکومت پنجاب کے لہور لہور اے فیسٹیول کو محدود کردیا گیا

حکومت پنجاب کے لہور لہور اے فیسٹیول کو محدود کردیا گیا ہے۔ سولہ روز ہونے والے گرینڈ میوزیکل شوز کو فیسٹیول سے ختم کردیا گیا۔ ان شوز میں گلوکارہ حدیقہ کیانی ۔حمیرا ارشد ۔ ساحر علی بگا۔عارف لوہار سمیت دیگر گلوکاروں نے پرفارم کرنا تھا۔ فیسٹیول میں آرٹ نمائشیں صوفی پروگرامز ڈرامے اور منی میراتھن سمیت دیگر پروگرامز ہوں گے۔ الحمرا کلچرل کمپلیکس کی بجائے الحمرا آرٹ سینٹر میں سارا فیسٹیول ہوگا۔ جیلانی پارک میں بھی فیسٹیول کے پروگرامز ہوں گے۔ وزیر اعلی پنجاب سید محسن نقوی کل فیسٹیول کا افتتاح کریں گے۔ فیسٹیول اٹھائیس اکتوبر سے بارہ نومبر تک جاری رہے گا۔

لہور لہور ہے پنجاب کی متنوع ثقافت کو مقامی اور بین الاقوامی سطح پر متعارف کروانے کا سبب بنے گا. ثقافتی سرگرمیوں میں نوجوانوں کی شرکت اور سوشل میڈیا پر کوریج اسے مزید موثر بنائے گی۔16 دن تک جاری رہنے والے اس میگا ایونٹ میں پنجاب کے 8سے زائد محکمے حصہ لیں گے ۔محکمہ اطلاعات و ثقافت آرٹس کونسلز اور کلچرل کمپلیکسز میں مختلف ثقافتی سرگرمیوں کے ذریعے پنجاب کی رنگا رنگ ثقافت سے اگاہی کو یقینی بنائے گا۔آرٹس کونسلز میں فنون لطیفہ کی مختلف اصناف کی نمائش اور مقابلے منعقد کروائے جائیں گے۔

تھیٹر اور کلچرل کمپلیکس میں ڈرامے پتلی تماشے،میجک شو اور سٹیج شوز بچوں اور بڑوں دونوں کو تفریح کے یکساں مواقع مہیا کریں گے۔ پنجاب ہارٹیکلچر اتھارٹی لاہور میں تاریخی و سیاحتی اہمیت کے حامل مقامات کی تزئین و آرائش کا اہتمام کرے گی ۔ہارٹیکلچر اتھارٹی کے تحت جیلانی پارک میں کلچرل میلہ بھی منعقد کروایا جائے گا۔ والڈ سٹی لاہور سیاحوں کی میزبانی کے فرائض سر انجام دے گا۔پکار بچوں اور بڑوں کے لیے مختلف ثقافتی سرگرمیوں کا اہتمام کرے گی۔محکمہ کھیل و امور نوجوانان میلے میں نوجوانوں کی دلچسپی کے لیے، میراتھن ،کھیلوں کے مقابلے اور سائیکل ریس منعقد کروائے گا۔ میلے میں مقامی کھیلوں کو بھی نمائندگی دی جائے گی۔