استحکام پاکستان پارٹی کل سے سیاسی جلسوں کا آغاز کرے گی

استحکام پاکستان پارٹی سیاسی طاقت کا مظاہر ہ کرنے کے لئے تیار، استحکام پاکستان پارٹی کل سے سیاسی جلسوں کا آغاز کرے گی، پارٹی نے 28 اکتوبر سے نو دسمبر تک جلسوں کا شیڈول جاری کر دیا۔ آئی پی پی کل 28 اکتوبر کو خانیوال میں جہانیاں اسٹیڈیم میں سیاسی طاقت کا مظاہر ہ کرے گی۔ جہانیان اسٹیڈیم میں پنڈال کی تیاری کا کام جاری ہے۔

کل جلسے سے جہانگیر خان ترین، عبدالعلیم خان، ڈاکٹر فردوس عاشق اعوان، عون چوہدری ایاز خان نیازی جلسے سے خطاب کریں گے۔ پہلے مرحلے میں 9اضلاع میں جلسے ہوں گے۔ 3نومبر کو حافظ آباد، 9نومبر کو نارووال،12نومبر لیہ اور 17نومبر کو قصور میں آئی پی پی سیاسی میدان لگائے گی۔ بیس نومبر گوجرانوالہ، 24نومبر جھنگ، 2دسمبر ساہیوال اور9دسمبر کو فیصل آباد میں جلسے ہوں گے۔ دوسرے مرحلے میں ملتان،راولپنڈی، شیخوپورہ،سیالکوٹ،بہاولپوراور دیگر اضلاع میں جلسے ہونگے۔

دوسری جانب استاحکام پاکستان پارٹی کو عقاب کا نشانہ الاٹ کر دیا گیا ہے۔ استحکام پاکستان پارٹی کو شاہین کا انتخابی نشان ملنے پر مرکزی سیکرٹری اطلاعات ڈاکٹر فردوس عاشق اعوان نے ردعمل دیتے ہوئے کہا ہے کہ آج استحکام پاکستان پارٹی نے ایک اور سنگ میل عبور کر لیا ہے۔ الیکشن کمیشن آف پاکستان نے آئی پی پی کو شاہین کا انتخابی نشان الاٹ کر دیا۔ آئی پی پی نے اپنی درخواست میں شاہین کا نشان مانگ رکھا تھا۔