4 اکتوبر کو ہر صورت ڈی چوک پہنچیں گے: علی امین گنڈاپور
اسلام آباد: وزیراعلیٰ خیبر پختونخوا علی امین گنڈا پور نے ڈی چوک اسلام آباد پر چار اکتوبر کو ہونے والے احتجاج کے حوالے سے بیان دیتے ہوئے کہا کہ چاہے جتنا وقت بھی لگ جائے ہم ہر حال میں ڈی چوک پہنچیں گے۔
اپنے ویڈیو بیان میں علی امین گنڈا پور نے عوام کو آئین کے تحفظ اور قانون کی پاسداری کے لیے نکلنے کی اپیل کی اور کہا کہ خوف کے بُت توڑ کر لوگ حقیقی آزادی کے لیے میدان میں آئیں گے۔ ہم ایک ایسی جنگ لڑ رہے ہیں جس کا مقصد اپنا حق واپس لینا ہے، اور یہ جنگ اپنے مقصد کے حصول تک جاری رہے گی۔
وزیراعلیٰ نے وفاقی حکومت اور پنجاب کی نگران حکومت کو تنقید کا نشانہ بناتے ہوئے کہا کہ چاہے وہ کتنا ہی تشدد کریں، ہم اپنا آئینی حق ضرور حاصل کریں گے۔ انہوں نے پرائیویٹ گاڑیوں کی پکڑ دھکڑ کو غیر قانونی اقدام قرار دیا اور کہا کہ موٹر وے پر گاڑیاں لانے والے مالکان کو نقصان پہنچنے کی صورت میں حکومت کو ذمہ دار ٹھہرایا جائے گا۔
علی امین گنڈا پور نے مزید کہا کہ وفاقی اور پنجاب حکومت گاڑی مالکان پر ظلم کرکے ان کی گاڑیاں ضبط کر رہی ہے، اور ساتھ ہی اعلان کیا کہ احتجاجی قافلے پشاور سے صبح دس بجے اور صوابی سے گیارہ بجے روانہ ہوں گے۔
