وزرا اور پارلیمانی سیکرٹریز کے لیے 76 نئی گاڑیوں کی خریداری کی منظوری

وزرا اور پارلیمانی سیکرٹریز کے لیے 76 نئی گاڑیوں کی خریداری کی منظوری

لاہور: پنجاب حکومت نے وزراء، پارلیمانی سیکرٹریز اور پروٹوکول ڈیوٹیز کے لیے نئی گاڑیاں خریدنے کی منظوری دے دی ہے۔

باوثوق ذرائع کے مطابق پنجاب سب کیبنٹ کمیٹی برائے خزانہ نے 76 نئی گاڑیوں کی خریداری کے لیے 61 کروڑ 24 لاکھ 75 ہزار روپے جاری کرنے کا حکم دیا ہے۔ ایڈیشنل چیف سیکرٹری احمد رضا سرور کی جانب سے نئی گاڑیوں کی خریداری کی سمری پنجاب کابینہ کو ارسال کی گئی تھی۔

ذرائع نے مزید بتایا کہ صوبائی کابینہ اور پارلیمانی سیکرٹریز کے لیے 29 ٹیوٹا کرولا اور گرینڈی گاڑیاں خریدی جائیں گی، جن پر 22 کروڑ 1 لاکھ 39 ہزار روپے خرچ ہوں گے۔ پروٹوکول ڈیوٹیز کے لیے 15 گاڑیاں خریدی جائیں گی، جس پر 9 کروڑ 96 لاکھ 15 ہزار روپے لاگت آئے گی، جبکہ 2 فارچونر گاڑیاں ایس سی او ڈیوٹیز کے لیے خریدی جائیں گی جن کی مجموعی قیمت 3 کروڑ 61 لاکھ روپے ہوگی۔

مزید یہ کہ صوبائی وزراء کی حفاظت کے لیے پروٹوکول کے تحت 30 سنگل کیبن ڈالے بھی خریدے جائیں گے جن پر 20 کروڑ 90 لاکھ روپے خرچ ہوں گے۔ گاڑیوں کی خریداری کے دوران ٹیکسز کی مد میں 1 کروڑ 74 لاکھ 95 ہزار روپے خرچ ہوں گے جبکہ گاڑیوں کی تزئین و آرائش کے لیے 3 کروڑ روپے اضافی مختص کیے گئے ہیں۔