نہ کسی جنرل کی چھڑی بڑی ہے نہ کسی کی رٹ، بات پاکستان کی ہونی چاہیے:حافظ نعیم الرحمن

نہ کسی جنرل کی چھڑی بڑی ہے نہ کسی کی رٹ، بات پاکستان کی ہونی چاہیے:حافظ نعیم الرحمن

امیر جماعت اسلامی، حافظ نعیم الرحمن نے حکومت کو ججز کی عمر اور تعداد سے متعلق بل کے معاملے پر خبردار کیا ہے اور زور دیا ہے کہ حکومت اس قسم کے متنازع بل سے باز رہے تاکہ ملک میں نیا بحران پیدا نہ ہو۔ انہوں نے اپنے بیان میں حکومت اور اپوزیشن کو ملکی مفاد کے لیے بات چیت کی میز پر لانے پر بھی زور دیا۔

حافظ نعیم الرحمن نے کہا کہ پاکستان کے مفاد میں سب کو ملکی سلامتی کی بات کرنی چاہیے۔ ان کا کہنا تھا کہ نہ کسی جنرل کی چھڑی بڑی ہے نہ کسی کی رٹ، بات پاکستان کی ہونی چاہیے۔ اگر علی امین گنڈا پور سنجیدہ ہیں، تو وفاقی اور صوبائی حکومت کو آن بورڈ لے کر افغانستان سے بات چیت کریں۔ انہوں نے مزید کہا کہ اگر لکی مروت یا بنوں میں جرگہ کامیاب ہو سکتا ہے تو پورے ملک میں بات چیت کے ذریعے مسائل کا حل نکالا جا سکتا ہے۔

حافظ نعیم نے زور دیتے ہوئے کہا کہ حکومت کو ججز کی عمر اور تعداد کے حوالے سے بل سے گریز کرنا چاہیے تاکہ نیا مسئلہ نہ پیدا ہو۔ انہوں نے اپوزیشن کے ساتھ مذاکرات بند کرنے کو حکومت کی بڑی ناکامی قرار دیا اور خبردار کیا کہ اگر یہ سلسلہ جاری رہا تو ملک کی سیاسی صورت حال مزید خراب ہو سکتی ہے۔

امیر جماعت اسلامی نے اپوزیشن اور حکومت کے درمیان بات چیت کی ناکامی پر تشویش کا اظہار کرتے ہوئے کہا کہ خان صاحب پہلے مذاکرات کر رہے تھے لیکن اب بات چیت کا سلسلہ رکا ہوا ہے۔ حکومت کا فرض ہے کہ وہ آل پارٹیز کانفرنس بلائے تاکہ ملکی مفاد میں مسائل کا حل تلاش کیا جا سکے۔ انہوں نے کہا کہ ہم بلوچستان اور قبائلی علاقوں سمیت ملکی سالمیت پر بات چیت کر رہے ہیں، اور یہ حکومت کی ذمہ داری ہے کہ وہ سب کو مذاکرات کی میز پر لائے۔

حافظ نعیم الرحمن نے ملک کی توانائی کی ضروریات پر بھی بات کی اور کہا کہ اگر پاکستان پاک ایران گیس پائپ لائن جیسے منصوبے کو آگے بڑھائے تو اربوں روپے بچائے جا سکتے ہیں۔ انہوں نے کہا کہ بھارت اور یورپ اگر ایران سے گیس حاصل کر سکتے ہیں تو پاکستان کیوں نہیں؟ ان کے بقول، یہ امریکا سے زیادہ امریکا کی غلامی کا مسئلہ ہے۔

حافظ نعیم الرحمن نے نیب (نیب آرڈیننس) کو تنقید کا نشانہ بنایا اور کہا کہ اسے سیاسی انتقام کے لیے استعمال کیا گیا۔ ان کے مطابق، نیب نے پلی بارگین کے ذریعے عوام کے پیسے خزانے میں واپس لانے کی بجائے افراد کی جیبیں بھریں۔ ان کا کہنا تھا کہ معیشت کو نیب کی ناکامیوں کی وجہ سے شدید نقصان پہنچا۔
حافظ نعیم الرحمن نے علی امین گنڈا پور کے حالیہ بیانات پر سخت ردعمل دیا اور کہا کہ انہیں پوری قوم سے معافی مانگنی چاہیے۔ ان کے مطابق، ایک صوبے کے وزیر اعلیٰ نے جو زبان استعمال کی، اس سے قوم کے لاکھوں بچے متاثر ہو سکتے ہیں۔ صحافت کو بھی خود احتسابی کرنی چاہیے کہ وہ کسی سیاسی جماعت کی نمائندگی نہ بنے۔