قاضی فائز عیسیٰ کا توسیع نہ لینے کا اعلان بہت کچھ واضح کر دے گا، بیرسٹر گوہر
اسلام آباد: پاکستان تحریک انصاف کے چیئرمین بیرسٹر گوہر نے کہا ہے کہ اگر چیف جسٹس قاضی فائز عیسیٰ توسیع لینے سے منع کردیں تو بہت سی چیزیں واضح ہو جائیں گی۔ بیرسٹر گوہر نے یہ بیان میڈیا سے بات کرتے ہوئے دیا، جس میں انہوں نے عدالتی نظام اور چیف جسٹس کی ممکنہ توسیع کے حوالے سے گفتگو کی۔
بیرسٹر گوہر کا کہنا تھا کہ چیف جسٹس قاضی فائز عیسیٰ پر ایک بڑی ذمہ داری عائد ہوتی ہے اور اگر وہ توسیع لینے سے منع کر دیتے ہیں، تو یہ ایک مضبوط پیغام ہوگا اور ایک نیا ٹرینڈ سیٹ ہوگا۔ ان کا مزید کہنا تھا کہ وہ تمام ججز کی عزت کرتے ہیں اور ان سے بہتر فیصلوں کی توقع رکھتے ہیں۔
اس موقع پر بیرسٹر گوہر نے اسمبلی کی کارروائی پر بھی تنقید کی۔ ان کا کہنا تھا کہ آج ہمیں اسمبلی میں بولنے کا موقع نہیں دیا گیا اور اس کے باوجود وہ خواجہ آصف کی بات کا جواب دے رہے ہیں۔ انہوں نے کہا کہ ہم اپوزیشن میں ضرور ہیں لیکن حکومت کے غلام نہیں ہیں۔ جب ہم بات کرتے ہیں تو حکومت کو سننے کا حوصلہ بھی رکھنا چاہیے۔
بیرسٹر گوہر نے خیبرپختونخوا کے وزیراعلیٰ کے بارے میں خواجہ آصف کے الفاظ کی مذمت کی اور کہا کہ خواجہ آصف نے اسمبلی میں جو اسپیشل کمیٹی کی بات کی، وہ مکمل طور پر درست طریقے سے پیش نہیں کی گئی۔ انہوں نے واضح کیا کہ ان کی پارٹی واک آؤٹ نہیں کر رہی، بلکہ وہ اس فورم کو مضبوط بنانے کے لیے کام کر رہے ہیں۔
اپنے بیان میں بیرسٹر گوہر نے خواتین اور بچوں کے ساتھ زیادتیوں کا ذکر کرتے ہوئے کہا کہ ہماری خواتین اور بچوں کے ساتھ جو سلوک ہوا، اس پر ہمیں انصاف ملنا چاہیے۔ انہوں نے اپنی پارٹی کی مشکلات اور قربانیوں کو بھی اجاگر کیا اور کہا کہ ان کی پارٹی کے ساتھ جو زیادتی ہوئی، وہ ناقابل برداشت ہے۔
