’’حکومت نے ریلیف فراہم نہ کیا تو عوام بجلی اور گیس کے مہنگے بل ادا نہیں کریں گے‘‘

’’حکومت نے ریلیف فراہم نہ کیا تو عوام بجلی اور گیس کے مہنگے بل ادا نہیں کریں گے‘‘

راولپنڈی : امیر جماعت اسلامی حافظ نعیم الرحمٰن نے بجلی کے بلوں میں اضافے کے خلاف شدید احتجاج کرتے ہوئے کہا ہے کہ حکومت عوام سے قربانی کا مطالبہ کر رہی ہے جبکہ عوام پہلے ہی مہنگائی سے پریشان ہیں۔ انہوں نے خبردار کیا کہ اگر حکومت نے ریلیف فراہم نہ کیا تو عوام بجلی اور گیس کے مہنگے بل ادا نہیں کریں گے۔
ورکرز کنونشن سے خطاب کرتے ہوئے حافظ نعیم الرحمٰن نے حکومت کو دیے گئے 45 دن کی مدت کا ذکر کرتے ہوئے کہا کہ اس ڈیڈ لائن کا اختتام قریب ہے اور حکومت کو عوامی مطالبات پورے کرنے کے لیے صرف 13 سے 14 دن کا وقت باقی ہے۔ ان کا کہنا تھا کہ جماعت اسلامی تصادم کی بجائے پُرامن جدوجہد پر یقین رکھتی ہے لیکن عوامی طاقت کو کوئی نہیں روک سکتا، اور 25 کروڑ عوام اپنا حق چھین کر لیں گے۔
انہوں نے کہا کہ راولپنڈی میں 14 دن کے دھرنے کی میزبانی شاندار رہی اور اب حکومت کو فیصلہ کرنا ہوگا کہ وہ عوام کو ریلیف دے یا عوام احتجاج کے دوسرے مرحلے کی طرف جائیں۔ ان کا کہنا تھا کہ حکومت نے پنجاب میں 14 روپے کا معمولی ریلیف دیا ہے، جو ناکافی ہے۔ انہوں نے جاگیرداروں پر ٹیکس نہ لگانے اور اشرافیہ کی جانب سے ملکی وسائل پر قابض ہونے پر بھی تنقید کی۔