پاکستانی سمندر میں دنیا کے چوتھے سب سے بڑے تیل و گیس کے ذخائر کی نشاندہی
کراچی: پاکستان کے سمندر میں دنیا کے چوتھے سب سے بڑے گیس اور تیل کے ذخائر کا انکشاف ہوا ہے، جو ملک کی توانائی کی ضروریات کے لئے ایک اہم پیشرفت ہے۔ میڈیا رپورٹس کے مطابق، اعلیٰ سیکیورٹی حکام نے اس بڑی خوشخبری کا اعلان کیا ہے۔ ان کے مطابق، ایک دوست ملک کے ساتھ مل کر جغرافیائی سروے کا کام مکمل کیا گیا، جس میں تقریباً تین سال سے زائد کا وقت لگا۔
اس سروے نے سمندر میں موجود تیل اور گیس کے ذخائر کی جگہ کی نشاندہی کی ہے، جو ملک کے اقتصادی مستقبل کے لئے ایک اہم قدم ہے۔ سابق اوگرا ممبر محمد عارف نے اس دریافت کو "گیم چینجر” قرار دیتے ہوئے کہا کہ تیل کے ذخائر کی دریافت پاکستان کی توانائی کی پالیسی کو نئی سمت دے سکتی ہے اور گیس کے ذخائر سے ملک کی معیشت میں بہتری آسکتی ہے۔
انہوں نے مزید کہا کہ پاکستان ہر سال تقریباً 200 ارب ڈالر تیل اور گیس پر خرچ کرتا ہے، جس سے اندازہ لگایا جا سکتا ہے کہ یہ دریافت کس قدر اہمیت رکھتی ہے۔ پاکستان کا سمندر تقریباً 3 ہزار کلومیٹر طویل ہے، اور اس وسیع علاقے میں مزید ذخائر کی دریافت کی امید بھی کی جا رہی ہے۔
