بارشوں سے پاکستان میں 306 افراد ہلاک، تفصیلی رپورٹ جاری

بارشوں سے پاکستان میں 306 افراد ہلاک، تفصیلی رپورٹ جاری

اسلام آباد— نیشنل ڈیزاسٹر مینجمنٹ اتھارٹی (این ڈی ایم اے) نے یکم جولائی سے 2 ستمبر تک ہونے والی بارشوں اور اس کے نتیجے میں ہونے والے جانی و مالی نقصانات کی تفصیلی رپورٹ جاری کر دی ہے۔ رپورٹ میں انکشاف کیا گیا ہے کہ شدید بارشوں کے دوران ملک بھر میں 306 افراد جاں بحق ہوئے۔ مرنے والوں میں 101 مرد، 50 خواتین، اور 155 بچے شامل ہیں۔
رپورٹ کے مطابق سب سے زیادہ اموات پنجاب میں ہوئیں، جہاں 114 افراد بارشوں کے نتیجے میں جان سے ہاتھ دھو بیٹھے۔ خیبرپختونخواہ میں 88، سندھ میں 61، بلوچستان میں 31، آزاد جموں و کشمیر میں 8، اور گلگت بلتستان میں 4 افراد جاں بحق ہوئے۔ اس کے علاوہ، مختلف حادثات میں 591 افراد زخمی ہوئے جنہیں مختلف ہسپتالوں میں علاج معالجے کے لئے منتقل کیا گیا۔
این ڈی ایم اے کی رپورٹ میں یہ بھی بتایا گیا ہے کہ ان شدید بارشوں کے نتیجے میں 23,416 انفراسٹرکچر کی تباہی ہوئی ہے۔ تباہ شدہ انفراسٹرکچر میں رہائشی مکانات، سڑکیں، پل، اور تعلیمی ادارے شامل ہیں۔ خاص طور پر، 8 اسکولوں اور 35 پلوں کے تباہ ہونے کی تصدیق کی گئی ہے، جس کی وجہ سے تعلیمی سرگرمیاں اور نقل و حمل کی سہولیات بری طرح متاثر ہوئیں۔
بلوچستان اور خیبرپختونخواہ میں سب سے زیادہ انفراسٹرکچر کو نقصان پہنچا ہے۔ مقامی حکام نے متاثرہ علاقوں میں امدادی کارروائیاں جاری رکھنے کا اعلان کیا ہے تاکہ متاثرہ لوگوں کی بحالی اور تعمیر نو کے کام کو جلد از جلد مکمل کیا جا سکے۔
این ڈی ایم اے نے اپنی رپورٹ میں حکومت اور متعلقہ اداروں کو مشورہ دیا ہے کہ مستقبل میں ایسے موسمیاتی حادثات سے بچاؤ کے لیے زیادہ موثر حکمت عملی اور پیشگی منصوبہ بندی کی جائے۔ ادارے نے عوام کو بھی متنبہ کیا ہے کہ وہ احتیاطی تدابیر اختیار کریں اور ممکنہ حادثات سے بچنے کے لیے حفاظتی اقدامات کو یقینی بنائیں۔
بارشوں کی وجہ سے ہونے والی جانی و مالی نقصانات کے پیش نظر، این ڈی ایم اے اور دیگر متعلقہ ادارے مسلسل کوشش کر رہے ہیں کہ متاثرین کو زیادہ سے زیادہ ریلیف فراہم کیا جائے اور متاثرہ علاقوں میں امدادی سرگرمیوں کو تیز کیا جائے۔