جماعت اسلامی کا بڑا اعلان, اسلام آباد کی طرف لانگ مارچ کا عندیہ

جماعت اسلامی کا بڑا اعلان, اسلام آباد کی طرف لانگ مارچ کا عندیہ

راولپنڈی: نائب امیرِ جماعتِ اسلامی پاکستان لیاقت بلوچ نے راولپنڈی میں ایک اہم پریس کانفرنس کرتے ہوئے کہا کہ ملک میں بڑھتی ہوئی مہنگائی، مہنگی بجلی، اور ٹیکسز کے بوجھ کے خلاف سخت احتجاج کا اظہار کیا۔ انہوں نے کہا کہ اب عوام کے لیے بدترین معاشی حالات ناقابل برداشت ہو چکے ہیں، اور حکمرانوں کی فضول خرچیوں کے خلاف عوام کا غصہ عروج پر پہنچ چکا ہے۔

لیاقت بلوچ نے راولپنڈی چیمبر آف کامرس اور تاجر نمائندوں کی کامیاب ہڑتال پر شکریہ ادا کیا اور کہا کہ یہ احتجاج ایک واضح پیغام ہے کہ اب عوام بدترین مہنگائی، مہنگی بجلی، اور ٹیکسز کے انبار کے خلاف اٹھ کھڑے ہوچکے ہیں۔ ان کا کہنا تھا کہ موجودہ اقتصادی بحران اور تباہی کا نظام عوام کے لیے ناقابل قبول ہوچکا ہے، اور سفید پوش طبقے کے لیے زندگی گزارنا مشکل بنا دیا گیا ہے۔

لیاقت بلوچ نے کہا کہ آئی پی پیز کے معاہدے اب ناقابل قبول ہیں۔ ان کا کہنا تھا کہ حکمران عوام کا خون چوس کر اربوں روپے انڈیپینڈنٹ پاور پروڈیوسرز (آئی پی پیز) کے اندھے کنوئیں میں ڈال رہے ہیں، جو عوام کی مزید مشکلات کا باعث بن رہے ہیں۔ انہوں نے مطالبہ کیا کہ یہ معاہدے فوری طور پر ختم کیے جائیں اور عوام کو سستی بجلی فراہم کی جائے۔

لیاقت بلوچ نے واضح کیا کہ آج کی ہڑتال اسلام آباد کی طرف ملک گیر لانگ مارچ کا ٹریلر ہے۔ انہوں نے کہا کہ عوام اب حکمرانوں کی نااہلی اور عیاشیوں کے خلاف احتجاج کے لیے تیار ہیں، اور جلد ہی ملک کے ہر شہر اور قصبے سے لوگ سڑکوں پر نکلیں گے۔ انہوں نے کہا کہ جماعت اسلامی عوام کے حقوق کے لیے میدان میں ہے اور ان کے مسائل کا حل کرنے کے لیے ہر ممکن اقدام کرے گی۔

انہوں نے مزید کہا کہ ملک میں جاری معاشی بدحالی اور حکومتی نااہلی کے باعث عوام بغاوت پر اتر آئے ہیں۔ جماعت اسلامی کا موقف ہے کہ موجودہ حکومتی پالیسیاں عوام کے لیے تباہ کن ثابت ہو رہی ہیں، اور ان کے خلاف بھرپور احتجاج کیا جائے گا۔ لیاقت بلوچ نے کہا کہ ہم عوام کے ساتھ کھڑے ہیں اور ان کے حقوق کے حصول کے لیے ہر ممکن اقدام کریں گے۔