امریکہ اور عالمی برادری کی بلوچستان میں دہشت گرد حملوں کی شدید مذمت
واشنگٹن، لندن، ریاض:بلوچستان میں دہشت گردی کی حالیہ لہر کے بعد عالمی برادری نے سخت ردعمل کا اظہار کیا ہے۔ امریکی محکمہ خارجہ کے ترجمان میتھیو ملر نے دہشت گرد حملوں کی شدید مذمت کرتے ہوئے کہا کہ پاکستان کی عوام نے دہشت گردی کی وجہ سے بے پناہ نقصان اٹھایا ہے، اور موسیٰ خیل میں 23 بے گناہ شہریوں کا قتل انتہائی افسوسناک ہے۔ انہوں نے مزید کہا کہ امریکہ اور پاکستان کے درمیان علاقائی سلامتی کو لاحق خطرات سے نمٹنے میں مشترکہ مفادات ہیں اور اس جنگ میں امریکہ پاکستان کے ساتھ کھڑا ہے۔
سعودی عرب، برطانیہ، اور یورپی یونین نے بھی بلوچستان میں ہونے والے دہشت گردی کے حملوں کی مذمت کرتے ہوئے قیمتی انسانی جانوں کے نقصان پر افسوس کا اظہار کیا ہے۔ سعودی وزارت خارجہ نے اپنے بیان میں کہا کہ دہشت گردی کے خلاف جنگ میں سعودی عرب پاکستان کے ساتھ مکمل تعاون جاری رکھے گا۔
بلوچستان میں حالیہ حملوں نے عالمی برادری کو پاکستان کے ساتھ اپنی یکجہتی کا اظہار کرنے پر مجبور کر دیا ہے، اور یہ حملے ایک بار پھر اس بات کی یاددہانی کراتے ہیں کہ دہشت گردی کے خلاف جنگ میں پاکستان کی قربانیاں اور مشکلات کتنی زیادہ ہیں۔
