ایران میں پاکستانی زائرین کی بس حادثے کا شکار، 32 جاں بحق
لاڑکانہ: لاڑکانہ سے مقدس مقامات کی زیارت کے لیے جانے والے زائرین کی بس ایران میں ایک حادثے کا شکار ہو گئی، جس کے نتیجے میں 32 افراد جاں بحق ہوگئے۔
سید اطہر شاہ شمسی کی قیادت میں قافلہ دو بسوں اور 110 زائرین پر مشتمل تھا۔ زائرین کی ایک بس ایران کے شہر یزد پہنچی، جہاں بس کے بریک مبینہ طور پر ناکام ہو گئے۔
اس حادثے میں 32 زائرین کی موت واقع ہو چکی ہے اور اطلاعات کے مطابق 30 زائرین شدید زخمی ہیں۔
ذرائع کے مطابق، بس میں سوار بیشتر زائرین کا تعلق لاڑکانہ سے تھا۔
زائرین کی دوسری بس اس وقت گوادر اور ایران کی سرحدی پٹی کے قریب رمدان کے علاقے میں موجود ہے، جو کہ یزد میں حادثے کا شکار ہونے والی بدقسمت بس سے چند گھنٹوں کی مسافت پر ہے۔
