صدر آصف علی زرداری نے الیکشن ایکٹ ترمیمی بل 2024 پر دستخط کر دیے

صدر آصف علی زرداری نے الیکشن ایکٹ ترمیمی بل 2024 پر دستخط کر دیے

صدر مملکت آصف علی زرداری نے الیکشن ایکٹ ترمیمی بل 2024 پر دستخط کر دیے، جس کے بعد یہ بل باقاعدہ قانون بن گیا ہے۔ زرداری نے گزشتہ شب اس بل پر دستخط کئے اور اسے گزٹ نوٹیفکیشن کے لیے سینیٹ سیکرٹریٹ بجھوا دیا گیا۔ الیکشن کمیشن کے مطابق اس بل کا گزٹ نوٹیفکیشن آج جاری کر دیا جائے گا۔

یہ بل 6 اگست کو قومی اسمبلی میں اپوزیشن کے شور شرابے اور ہنگامہ آرائی کے باوجود کثرت رائے سے منظور کیا گیا تھا۔ اس بل کو الیکشن (دوسرا ترمیمی) ایکٹ 2024 کا نام دیا گیا ہے جس میں الیکشن ایکٹ 2017 میں ترامیم کی گئی ہیں۔ ان ترامیم میں سیکشن 66 اور سیکشن 104 میں تبدیلیاں شامل ہیں۔

پہلی ترمیم کے مطابق، کسی سیاسی جماعت کی جانب سے وابستگی کا اقرار نامہ تبدیل نہیں کیا جا سکتا۔ دوسری ترمیم کے تحت، جس پارٹی نے مخصوص نشستوں کی فہرست جمع نہیں کروائی ہو، وہ ان نشستوں کی حقدار نہیں ہو گی۔ مزید برآں، انتخابی نشان کے حصول سے قبل پارٹی سرٹیفکیٹ جمع نہ کروانے والا امیدوار آزاد تصور کیا جائے گا۔

ترمیمی بل میں یہ بھی کہا گیا ہے کہ کسی بھی امیدوار کی جانب سے مقررہ مدت میں ایک مرتبہ کسی سیاسی جماعت سے وابستگی کا اظہار ناقابل تنسیخ ہو گا۔

واضح رہے کہ پاکستان تحریک انصاف نے اس الیکشن ترمیمی ایکٹ کو سپریم کورٹ میں چیلنج کردیا ہے۔