چیف جسٹس کے خلاف فتویٰ: تحریک لبیک کے رہنما کا 7 روزہ جسمانی ریمانڈ منظور
لاہور میں تحریک لبیک کے رہنما مولانا طاہر سیفی کو انسداد دہشتگردی عدالت میں پیش کیا گیا جہاں ان کی تقریر کا متن عدالت میں سنایا گیا۔ سماعت کے دوران جج خالد ارشد نے ملزم سے پوچھا کہ آیا یہ ان کی تقریر ہے، جس پر ملزم نے اقرار کیا کہ یہ ان کی ہی تقریر ہے۔
عدالت نے ملزم سے پوچھا کہ انہوں نے چیف جسٹس پاکستان کے خلاف کیوں تقریر کی، جس پر ملزم نے جواب دیا کہ وہ چیف جسٹس کو محتاط رہنے کا مشورہ دے رہے تھے اور ان کا فیصلہ آئین کے خلاف تھا۔ ملزم نے مزید کہا کہ ابھی وقت ہے کہ چیف جسٹس اپنے فیصلے پر نظر ثانی کریں۔
تفتیشی افسر نے عدالت کو بتایا کہ ملزم کا فوٹو گرامیٹک ٹیسٹ اور مائیکروفون برآمد کرنا ضروری ہے، جس کے لیے جسمانی ریمانڈ درکار ہے۔
فریقین کے دلائل سننے کے بعد عدالت نے ملزم کا 7 روزہ جسمانی ریمانڈ منظور کرلیا اور اسے 6 اگست کو دوبارہ پیش کرنے کا حکم دیا۔
