گوادر میں ہجوم کو سکیورٹی فورسز پر حملہ، سپاہی شہید، افسر سمیت 16 اہلکار زخمی

گوادر میں ہجوم کو سکیورٹی فورسز پر حملہ، سپاہی شہید، افسر سمیت 16 اہلکار زخمی

راولپنڈی: گوادر میں ایک پرتشدد ہجوم نے سکیورٹی فورسز پر حملہ کیا جس کے نتیجے میں سپاہی شبیر بلوچ شہید ہو گئے۔

پاک فوج کے شعبہ تعلقات عامہ (آئی ایس پی آر) کے مطابق نام نہاد بلوچ راجی مچی کے نام پر اس ہجوم نے سکیورٹی فورسز پر حملہ کیا، جس سے سپاہی شبیر بلوچ کی شہادت ہوئی اور ایک افسر سمیت 16 اہلکار زخمی ہو گئے۔

آئی ایس پی آر کے ترجمان نے بتایا کہ مظاہرین نے سوشل میڈیا پر ہمدردی حاصل کرنے کے لیے جعلی تصاویر اور ویڈیوز کا استعمال کیا اور بدنیتی پر مبنی پروپیگنڈا پھیلایا۔ سکیورٹی فورسز نے پرتشدد ہجوم کی اشتعال انگیزی کا انتہائی صبر و تحمل سے سامنا کیا۔

آئی ایس پی آر نے واضح کیا کہ ایسی اشتعال انگیزی ناقابل قبول ہے اور ذمہ داروں کو انصاف کے کٹہرے میں لایا جائے گا۔ شہریوں سے اپیل کی گئی ہے کہ وہ پروپیگنڈے کا شکار نہ ہوں اور امن برقرار رکھنے کے لیے سیکیورٹی فورسز کے ساتھ تعاون کریں۔

آئی ایس پی آر نے یقین دلایا کہ قوم کے ساتھ مل کر بلوچستان میں امن کو سبوتاژ کرنے کی کوششوں کو ناکام بنانے کے لیے پرعزم ہیں۔