نئے انتخابات کی مخالفت، فارم 45 کی بنیاد پر تحقیقات کا مطالبہ: حافظ نعیم

نئے انتخابات کی مخالفت، فارم 45 کی بنیاد پر تحقیقات کا مطالبہ: حافظ نعیم

راولپنڈی کے لیاقت باغ میں جماعت اسلامی کے دھرنے سے خطاب کرتے ہوئے امیر جماعت اسلامی، حافظ نعیم نے کہا ہے کہ ملک میں نئے انتخابات کی کوئی ضرورت نہیں ہے۔ انہوں نے کہا کہ نئے انتخابات کا مطالبہ کرنے والا کوئی ملکی وفادار نہیں ہوسکتا بلکہ کسی اور کا ایجنٹ ہوسکتا ہے۔

حافظ نعیم نے کہا کہ موجودہ حالات میں فارم 47 والوں کو مسلط کردیا گیا ہے، جس کی وجہ سے عوام شدید مشکلات کا شکار ہیں۔ انہوں نے بجلی کے بلوں کی زیادتی کا ذکر کرتے ہوئے کہا کہ اس کی وجہ سے بھائی بھائی کو قتل کرنے پر مجبور ہوگیا ہے۔

انہوں نے فارم 45 کی موجودگی میں نئے انتخابات کی مخالفت کرتے ہوئے مطالبہ کیا کہ جسے عوام نے مینڈیٹ دیا ہے، اُسے حکومت دی جائے اور فارم 47 کے ذریعے مسلط کیے گئے افراد کو ہٹایا جائے۔ انہوں نے کہا کہ جوڈیشل کمیشن بنا کر فارم 45 کی بنیاد پر تحقیقات کی جائیں۔

امیر جماعت اسلامی نے کہا کہ کچھ جماعتیں نئے انتخابات کا مطالبہ اس لیے کررہی ہیں کہ انہیں حصہ نہیں ملا، لیکن اس طرح کے مطالبات ملکی مفاد کے خلاف ہیں۔ انہوں نے حکومت پر زور دیا کہ آئی پی پیز کے معاہدے ختم کرکے عوام کو ریلیف فراہم کیا جائے۔

حافظ نعیم نے کہا کہ مخصوص طبقے کو مفت پیٹرول، بجلی، گھر اور گیس کی فراہمی بند کی جائے اور عوام پر بوجھ کم کیا جائے۔ انہوں نے اعلان کیا کہ یہ دھرنا اس وقت تک جاری رہے گا جب تک بیوروکریٹس، فوج اور ججز کی مراعات ختم نہیں کی جاتیں اور آئی پی پیز کے غیر ضروری معاہدے منسوخ نہیں کیے جاتے۔

انہوں نے مزید کہا کہ حکومت اگر ٹیکس لیتی ہے تو ہر بچے کو معیاری تعلیم بھی فراہم کرے۔ جماعت اسلامی کے امیر نے عوامی مسائل کے حل کے لیے ایک ماہ تک دھرنا جاری رکھنے کا عزم ظاہر کیا۔