چین اور سعودی عرب سے 9 ارب ڈالر کے قرضے کی توقع

چین اور سعودی عرب سے 9 ارب ڈالر کے قرضے کی توقع، پاکستان دیامر بھاشا ڈیم کی فنڈنگ کا خواہاں

اسلام آباد: وزارت اقتصادی امور کے ذرائع نے بتایا ہے کہ چین اور سعودی عرب رواں مالی سال 2024-25 میں پاکستان کو 9 ارب ڈالر کا قرضہ رول اوور کرنے کا ارادہ رکھتے ہیں۔ اس کے ساتھ ہی پاکستان دیامر بھاشا ڈیم کے لیے فنڈنگ حاصل کرنے کی کوشش کر رہا ہے۔

ذرائع کے مطابق، پاکستان کو تیل اور اشیاء کی خریداری کے لیے اسلامی ترقیاتی بینک سے 500 ملین ڈالر کی فسیلٹی ملنے کی امید ہے۔ تاہم، سعودی عرب کی جانب سے تیل کے قرضے کی ایک اور سہولت میں توسیع کا امکان نہیں ہے۔

اقتصادی امور کی وزارت کے ذرائع کا مزید بتانا ہے کہ پاکستان کو اس سال میں 20.8 ارب ڈالر سے زیادہ کی کل ادائیگیوں کا سامنا ہے۔ جنیوا ڈونر کانفرنس نے 2023 میں 10.7 ارب ڈالر کی امداد کا وعدہ کیا تھا، لیکن اب تک صرف تین ارب ڈالر ہی ملے ہیں۔ پاکستان ڈونرز کانفرنس کے تحت کیے گئے وعدوں کی مد میں مزید فنڈنگ حاصل کرنے کی کوشش کر رہا ہے۔

مزید برآں، پاکستان داسو ہائیڈرو پاور پراجیکٹ کے لیے عالمی بینک سے ایک ارب ڈالر کی توقع کر رہا ہے جبکہ ایشین انفرااسٹرکچر انویسٹمنٹ بینک این فائیو پروجیکٹ کے لیے فنانسنگ فراہم کرے گا۔