وفاقی کابینہ کے اجلاس میں پی ٹی آئی پر پابندی کا کوئی فیصلہ نہ ہو سکا

وفاقی کابینہ کے اجلاس میں پی ٹی آئی پر پابندی کا کوئی فیصلہ نہ ہو سکا

اسلام آباد: وزیراعظم شہباز شریف کی زیرصدارت وفاقی کابینہ کا اجلاس ہوا جس میں اہم معاملات پر غور کیا گیا۔ تاہم، پی ٹی آئی پر پابندی کا معاملہ زیر غور نہیں آیا۔

ذرائع کے مطابق کابینہ نے دوست ممالک کے کاروباری افراد اور شہریوں کو ویزا فری انٹری کی منظوری دے دی ہے۔ وزارت داخلہ کی سمری پر 126 ممالک کے شہریوں کو ویزا فری داخلے کی منظوری دے دی گئی ہے، اور ان ممالک کے لیے ڈیجیٹل ویزا کے لیے بھی منظوری دی گئی ہے۔

کابینہ اجلاس میں ایس ای سی پی ایکٹ 1997 کے تحت خصوصی عدالتوں کے قیام کی منظوری، نجکاری کمیشن کے بورڈ کے اراکین کی تعداد میں اضافے اور متروکہ وقف املاک بورڈ کے چیئرمین کی تعیناتی کی منظوری بھی دی گئی۔ اس کے علاوہ کابینہ نے پاکستان اور ڈنمارک کے درمیان ایم او یو پر دستخط کی منظوری بھی دی۔

ذرائع کے مطابق وفاق کی 2021-22 اور 2022-23 کے لیے پالیسیوں پر عملدرآمد کی رپورٹ کابینہ میں پیش کی گئی۔

ذرائع نے بتایا کہ کابینہ اجلاس میں سابق صدر عارف علوی، عمران خان اور قاسم سوری پر آرٹیکل 6 لگانے کا معاملہ بھی زیر غور نہیں آیا۔

واضح رہے کہ وفاقی وزیر اطلاعات عطا تارڑ نے کہا تھا کہ حکومت نے تحریک انصاف پر پابندی لگانے کا فیصلہ کیا ہے اور اس حوالے سے پیپلزپارٹی سے مشاورت مکمل ہو چکی ہے، پی ٹی آئی پر پابندی کی منظوری کابینہ دے گی۔ تاہم، آج کے اجلاس میں اس معاملے پر کوئی غور نہیں کیا گیا۔