میرے کیسز ختم ہو رہے ہیں، 9 مئی کے مقدمات ملٹری کورٹ میں لے جانے کا منصوبہ ہے : عمران خان

عمران خان کی صحافیوں سے غیر رسمی گفتگو: مقدمات، احتجاج اور حکومتی اقدامات پر اظہار خیال

اسلام آباد: سابق وزیر اعظم عمران خان نے صحافیوں سے غیر رسمی گفتگو میں اپنے خلاف چلنے والے مقدمات، 9 مئی کے واقعات، اور موجودہ حکومت کے اقدامات پر کھل کر اظہار خیال کیا۔

عمران خان نے کہا کہ "میرے خلاف تمام کیسز ختم ہو رہے ہیں، لیکن اب ان کا پلان ہے کہ 9 مئی کے مقدمات ملٹری کورٹ میں لے جائیں۔” انہوں نے واضح کیا کہ انہوں نے جی ایچ کیو کے سامنے پُرامن احتجاج کی کال دی تھی، اور اس احتجاج کو بغاوت بنا دیا گیا۔

عمران خان نے مزید بتایا کہ 14 مارچ کو ان کے وکلاء نے شورٹی بانڈ دیا تھا کہ وہ گرفتاری دینے کے لیے تیار ہیں، لیکن 18 مارچ کو ان پر حملہ ہوا جس میں انہوں نے ایک شخص کا نام بھی لیا تھا۔ انہوں نے کارکنان کو پُرامن احتجاج کی ہدایت دی تھی۔

ڈاکٹر یاسمین راشد کے بارے میں عمران خان نے کہا کہ انہوں نے کارکنان کو جناح ہاؤس میں داخل ہونے سے روکا، اور ان کے 16 کارکنان شہید ہوئے، 3 لوگوں کی ٹانگیں کاٹی گئیں، اور ایک شخص معذور ہو گیا۔ 10 ہزار لوگوں کو گرفتار کیا گیا اور ان کو سزا دی گئی۔

عمران خان نے روف حسن کی گرفتاری کی شدید مذمت کی اور کہا کہ وہ صرف الیکشن کمیشن میں ایم این ایز کے بیان حلفی کی تصدیق کے لیے گئے تھے۔ انہوں نے خیبر پختونخوا، پنجاب، سینیٹ اور قومی اسمبلی کے لوگوں کو بھوک ہڑتال کی تیاری کرنے کی ہدایت دی۔

انہوں نے نواز شریف اور آرمی چیف کی لندن ملاقات پر تبصرہ کرتے ہوئے کہا کہ اس ملاقات میں انہیں دیوار سے لگانے کا فیصلہ ہوا۔ عمران خان نے مزید کہا کہ 9 مئی کی سی سی ٹی وی فوٹیج آئی ایس آئی نے چھپائی اور باجوڑ کے الیکشن میں ہونے والے واقعات سب کے سامنے ہیں۔

عمران خان نے رانا ثناء اللہ اور احسن اقبال کے بیانات پر بھی تبصرہ کیا، جنہوں نے انہیں جیل میں رکھنے کا مطالبہ کیا تھا۔ انہوں نے 14 مارچ کو پولیس اور رینجرز کے ان کے گھر پر دھاوا بولنے اور ان پر گولیاں چلانے کے واقعات کا ذکر بھی کیا۔

نواز شریف پر تنقید کرتے ہوئے عمران خان نے کہا کہ "نواز شریف مگرمچھ کے آنسو بہا رہا ہے، ان کی جائیدادیں پوری دنیا نے دیکھی جب وہ سامنے آئیں۔” انہوں نے آئی پی پیز کے ساتھ مہنگے معاہدوں اور 2018 کے سب سے بڑے خسارے پر بھی روشنی ڈالی۔

محسن نقوی کے بارے میں عمران خان نے کہا کہ وہ ایک وائسرائے کی طرح ہیں جو ہر وقت شہباز شریف کے ساتھ رہتے ہیں۔ عمران خان نے 9 مئی کے بعد ان کی پارٹی کے لوگوں کے اغواء اور آئی ایس آئی کی جانب سے سوشل میڈیا ٹیم کے افراد کی گرفتاری کی بھی مذمت کی۔