جنوبی وزیرستان کی مسجد میں دھماکہ، جے یو آئی رہنما سمیت 3 افراد زخمی

میرانشاہ (14 مارچ): جنوبی وزیرستان کے علاقے اعظم ورسک بازار میں ایک مسجد کے اندر دھماکہ ہوا، جس کے نتیجے میں متعدد افراد زخمی ہو گئے۔ پولیس نے واقعے کی تصدیق کرتے ہوئے بتایا کہ زخمیوں میں جے یو آئی (ف) کے رہنما مولانا عبداللہ بھی شامل ہیں۔ دھماکہ مسجد میں نصب کیے گئے دھماکہ خیز مواد کے ذریعے کیا گیا۔ ریسکیو ٹیمیں فوری طور پر موقع پر پہنچیں اور زخمیوں کو اسپتال منتقل کیا۔ ڈی پی او آصف بہادر کے مطابق، دھماکے میں 3 افراد زخمی ہوئے ہیں۔

چونکہ رمضان المبارک اور جمعۃ المبارک کی وجہ سے مساجد میں رش زیادہ ہوتا ہے، اس لیے زیادہ نقصان ہونے کا خدشہ ظاہر کیا جا رہا تھا۔ خوش قسمتی سے جانی نقصان کم ہوا، تاہم واقعے کے بعد علاقے میں خوف و ہراس پھیل گیا. پولیس اور قانون نافذ کرنے والے ادارے دھماکے کی مزید تحقیقات کر رہے ہیں۔ علاقے میں سیکیورٹی مزید سخت کر دی گئی ہے تاکہ کسی بھی مزید ناخوشگوار واقعے سے بچا جا سکے۔