اسحاق ڈار: دہشتگردوں کی واپسی ملک میں شہادتوں کا سبب بنی

نیو یارک: نائب وزیراعظم اسحاق ڈار نے کہا ہے کہ ملک میں ہونے والی شہادتیں ان دہشتگردوں کو واپس بلانے اور قاتلوں کو جیلوں سے چھوڑنے کا نتیجہ ہیں، جو پہلے سرحد پار بھاگ چکے تھے۔ نیو یارک میں پاکستانی کمیونٹی سے خطاب کرتے ہوئے انہوں نے کہا کہ پاکستان کی معیشت مستحکم ہو رہی ہے اور مہنگائی میں نمایاں کمی آئی ہے۔ پالیسی ریٹ 22 فیصد سے 12 فیصد پر آچکا ہے۔ معاشی استحکام پیدا ہو رہا ہے اور اقتصادی اشاریے بہتری کی جانب گامزن ہیں۔  ہر ماہ ملک کے ڈیفالٹ کی پیشگوئیاں کی جاتی تھیں، مگر ہم نے پاکستان کو ڈیفالٹ ہونے سے بچایا۔ عالمی سطح پر پاکستان کی معاشی بہتری کا اعتراف کیا جا رہا ہے۔

اسحاق ڈار نے کہا کہ دہشتگردی پہلے ختم ہو چکی تھی، مگر گزشتہ دو سالوں میں دوبارہ شدت اختیار کر گئی ہے۔ پاکستان نے دہشتگردی کی بڑی قیمت چکائی ہے، جس سے ملک کو معاشی نقصان بھی اٹھانا پڑا۔  ہمیں جائزہ لینا ہوگا کہ یہ صورتحال کیوں پیدا ہوئی۔  آنے والی نسلوں کے لیے ایک محفوظ اور ترقی یافتہ پاکستان چھوڑنا ہماری ذمہ داری ہے۔

نائب وزیراعظم نے مزید کہا کہ پاکستان کے عالمی سفارتی تعلقات بہتر کیے جا رہے ہیں، اور ہر پالیسی و فیصلہ ملک کی بہتری کے لیے ہونا چاہیے۔ "ہم چاہتے ہیں کہ پاکستان ترقی کرے اور ایک مستحکم ملک کے طور پر دنیا میں اپنا مقام بنائے۔”