کراچی: بغیر رجسٹریشن گاڑیوں پرمکمل پابندی، ڈمپرز کے اوقات میں تبدیلی

سندھ حکومت نے کراچی میں بغیر رجسٹریشن گاڑیوں کے سڑک پر آنے پر مکمل پابندی عائد کر دی ہے۔ سینئر صوبائی وزیر شرجیل میمن نے پریس کانفرنس میں اعلان کیا کہ بغیر رجسٹریشن کسی بھی گاڑی کو روڈ پر آنے کی اجازت نہیں ہوگی، اور خلاف ورزی کی صورت میں گاڑی ضبط کر لی جائے گی جبکہ متعلقہ شوروم کو بھی سیل کر دیا جائے گا۔

شرجیل میمن نے مزید کہا کہ واٹر بورڈ نے تمام واٹر ٹینکرز کے لیے بار کوڈز جاری کر دیے ہیں، جس کے بغیر کسی بھی ٹینکر کو چلنے کی اجازت نہیں ہوگی۔ اس اقدام کا مقصد گاڑیوں کی فٹنس چیک کرنا ہے تاکہ شہریوں کی حفاظت یقینی بنائی جا سکے۔ اس کے علاوہ، ہیوی ٹریفک کے لیے فٹنس سرٹیفکیٹ لازمی قرار دے دیا گیا ہے، جس کے لیے ٹرانسپورٹرز کو مہلت دی گئی ہے۔ سندھ میں داخل ہونے والی دیگر صوبوں کی ہیوی ٹریفک کو بھی سندھ حکومت سے فٹنس سرٹیفکیٹ لینا ہوگا۔

کراچی میں ڈمپرز کی آمد و رفت کے اوقات میں بھی ترمیم کی گئی ہے۔ پہلے ڈمپرز کو رات 11 بجے سے شام 6 بجے تک چلنے کی اجازت تھی، لیکن اب نیا وقت رات 10 بجے سے صبح 6 بجے تک کر دیا گیا ہے۔ یہ فیصلہ ٹریفک کی روانی بہتر بنانے اور عوام و ٹرانسپورٹرز کی سہولت کے لیے کیا گیا ہے، کیونکہ حالیہ ہفتوں میں ٹریفک حادثات میں اضافہ ہوا، جس میں ڈمپرز اور واٹر ٹینکرز کی ٹکر سے کئی شہری جاں بحق ہو چکے ہیں۔

شہریوں کے لیے اہم ہدایات ہیں کہ  اپنی گاڑی کی رجسٹریشن جلد مکمل کریں تاکہ کسی قانونی کارروائی سے بچا جا سکے۔ نئے قانون کے مطابق بغیر رجسٹریشن کوئی گاڑی شو روم سے باہر نہیں آ سکے گی، ورنہ شو روم سیل کر دیا جائے گا اور بغیر بار کوڈ والے واٹر ٹینکرز کو چلنے کی اجازت نہیں ہوگی۔