امریکا کی پاکستان کے لیے امداد بندش پر دفتر خارجہ کا ردعمل

امریکا کی پاکستان کے لیے امداد بندش پر دفتر خارجہ کا ردعمل

امریکا کی جانب سے پاکستان سمیت دیگر ممالک کے لیے امداد کی بندش پر دفتر خارجہ کا ردعمل سامنے آ گیا ہے۔ دفتر خارجہ کے ترجمان شفقت علی خان نے ہفتہ وار بریفنگ کے دوران کہا کہ ہم امریکی صدر کے آرڈر کا جائزہ لے رہے ہیں۔ برسوں سے پاکستان اور امریکا مختلف شعبوں میں مشترکہ پروگراموں پر کام کرتے رہے ہیں، اور ہم امداد کے معاملے پر امریکی حکام کے ساتھ رابطے میں ہیں۔

ترجمان نے کہا کہ ہم امریکا کے ساتھ معاشی تعلقات کو مزید بہتر بنانا چاہتے ہیں۔ امریکا اور بھارت کے تعلقات پر تبصرہ کرنا ہمارے لیے مناسب نہیں، لیکن پاکستان کے امریکا کے ساتھ تعلقات بہتر ہیں۔

انہوں نے بتایا کہ امریکی امداد تمام ممالک کے لیے 90 دن کے لیے معطل کی گئی ہے۔ پاکستان میں مختلف شعبوں میں امریکی امداد سے چلنے والے منصوبے جاری ہیں۔

امریکی کاروباری افراد کا دورہ پاکستان:
ترجمان نے کہا کہ پاکستان میں امریکی کاروباری افراد کا آنا جانا ایک معمول کا معاملہ ہے۔ یہ دورہ دفتر خارجہ کے ذریعے نہیں ہوا، بلکہ یہ کاروباری افراد خود آتے ہیں۔ مزید تفصیلات کے لیے ایس آئی ایف سی سے رابطہ کیا جا سکتا ہے۔

پاک نیوی کی امن مشقیں:
انہوں نے بتایا کہ پاک نیوی کی امن مشقیں 7 فروری سے 12 فروری تک ہوں گی۔ ان مشقوں کا مقصد امن قائم کرنا اور دیگر ممالک کی صلاحیتوں سے فائدہ اٹھانا ہے۔ اس میں 60 ممالک حصہ لیں گے۔

وزیر داخلہ کا امریکہ دورہ:
ترجمان نے کہا کہ وزیر داخلہ نے امریکہ کا دورہ کیا اور کانگریس کے ارکان سے ملاقات کی۔ وزیراعظم کو یہ اختیار ہے کہ وہ ملاقاتوں کے لیے کس کو ذمہ داری دے۔

مراکش میں پاکستانیوں کی واپسی:
انہوں نے بتایا کہ مراکش میں کشتی حادثے سے بچ جانے والے 22 پاکستانیوں کی واپسی کے لیے اقدامات کیے جا رہے ہیں۔ یہ معاملہ بہت حساس ہے، اس لیے ہم جلد بازی میں کوئی معلومات نہیں دے سکتے۔ دفتر خارجہ اور مراکش میں پاکستانی مشن رابطے میں ہے۔ آج کچھ پاکستانیوں کو واپس لایا گیا ہے۔

سوڈان اور ویسٹ بینک پر ردعمل:
ترجمان نے کہا کہ پاکستان سوڈان میں سعودی ہسپتال پر حملے کی مذمت کرتا ہے۔ اسی طرح، ویسٹ بینک میں اسرائیلی جارحیت کی بھی پاکستان مذمت کرتا ہے۔

دوحہ میں دوطرفہ اجلاس:
انہوں نے بتایا کہ پاکستان اور دوحہ کے درمیان 5 فروری کو دوطرفہ سیاسی مشاورتی اجلاس ہوگا، جس کی قیادت پاکستانی وفد کے نائب وزیر اعظم کریں گے۔