اسلام آباد:شبِ معراج، جو اسلامی تاریخ کی ایک مبارک اور بابرکت رات ہے، آج بروز سوموار ملک بھر میں مذہبی جوش و خروش اور احترام کے ساتھ منائی جائے گی۔
مساجد میں خصوصی چراغاں کیا جائے گا، اور محافلِ معراج شریف منعقد ہوں گی جہاں علمائے کرام اور مقررین معراج النبیﷺ کے واقعے پر روشنی ڈالیں گے۔ نعت خواں حضور اکرمﷺ کی شانِ اقدس میں نعت خوانی کریں گے، جبکہ ٹی وی چینلز اور ریڈیو پر شبِ معراج کے حوالے سے خصوصی پروگرام نشر کیے جائیں گے۔ اخبارات بھی اس موقع پر خصوصی اشاعت کا اہتمام کریں گے۔
ماہِ رجب کی 27ویں شب وہ مبارک رات ہے جب رسولِ اکرمﷺ کو معراج کا شرف عطا کیا گیا۔ آپﷺ حضرت جبرائیل علیہ السلام کے ساتھ براق پر سوار ہوکر مکہ مکرمہ سے مسجد اقصیٰ پہنچے، جہاں آپﷺ نے تمام انبیائے کرام کی نماز کی امامت فرمائی۔
اس کے بعد آپﷺ کو آسمانوں کی سیر کرائی گئی، جہاں اللہ تعالیٰ سے ملاقات ہوئی۔ اس سفر میں آپﷺ کو جنت اور دوزخ کے مناظر دکھائے گئے اور مختلف انبیائے کرام سے ملاقات کرائی گئی۔
شبِ معراج کے دوران امت مسلمہ کے لیے سب سے بڑا تحفہ نماز ہے، جو ایک عظیم عبادت اور قرب الٰہی کا ذریعہ ہے۔
شبِ معراج ہر سال ایمان کی تجدید، عقیدے کو مضبوط کرنے، اور اللہ تعالیٰ کی نعمتوں کا شکر ادا کرنے کے لیے یادگار رات ہوتی ہے۔ اس رات خصوصی عبادات، توبہ و استغفار، اور دعا کے ذریعے مسلمان اپنے رب کے حضور جھکتے ہیں اور اپنی روحانی ترقی کے لیے کوشاں رہتے ہیں۔
