ارکان پارلیمنٹ کی تنخواہوں میں 200 فیصد اضافے کی منظوری، سمری وزیراعظم کو ارسال کر دی گئی
اسلام آباد:قومی اسمبلی کی فنانس کمیٹی نے اراکین پارلیمنٹ کی تنخواہوں میں 200 فیصد اضافے کی سفارش منظور کرتے ہوئے سمری منظوری کے لیے وزیراعظم کو ارسال کر دی ہے۔
ذرائع کے مطابق، فنانس کمیٹی نے تجویز دی ہے کہ ایم این اے اور سینیٹرز کی ماہانہ تنخواہ اور مراعات بڑھا کر 5 لاکھ 19 ہزار روپے کی جائیں۔ اس تجویز کے مطابق، اراکین پارلیمنٹ کو وفاقی سیکریٹری کے برابر سہولیات اور مراعات حاصل ہوں گی۔
اطلاعات کے مطابق، پاکستان تحریک انصاف کے 67 اراکین نے تنخواہوں میں اضافے کا مطالبہ کیا تھا، جس پر مسلم لیگ ن، پیپلز پارٹی اور دیگر جماعتوں نے بھی حمایت کا اظہار کیا۔
یہ بھی بتایا گیا ہے کہ کچھ اراکین نے اپنی تنخواہ 10 لاکھ روپے ماہانہ مقرر کرنے کا مطالبہ کیا تھا، تاہم اسپیکر ایاز صادق نے یہ درخواست مسترد کر دی۔
مالی سال 2024-25 کے بجٹ میں اراکین اسمبلی کی تنخواہوں میں اضافے کا اختیار فنانس کمیٹی کو دیا گیا تھا، اور کمیٹی نے اس حوالے سے تجاویز وزیراعظم شہباز شریف کو بھجوا دی ہیں۔
