26 ویں آئینی ترمیم کے خلاف درخواستیں سماعت کیلئے آئینی بنچ کے سامنے مقرر

اسلام آباد: سپریم کورٹ سے ایک بڑی خبر سامنے آئی ہے جس کے مطابق 26ویں آئینی ترمیم کے خلاف درخواستیں سماعت کے لیے مقرر کی گئی ہیں۔
تفصیلات کے مطابق سپریم کورٹ نے 26ویں آئینی ترمیم کے خلاف درخواستوں کی سماعت کے لیے تاریخ مقرر کردی، 27 جنوری کو آٹھ رکنی آئینی بینچ اس اہم کیس کی سماعت کرے گا۔
جسٹس امین الدین خان کی سربراہی میں قائم آئینی بینچ 27 جنوری کی صبح ساڑھے نو بجے کیس کی سماعت کرے گا۔
بینچ میں جسٹس جمال خان مندوخیل، جسٹس محمد علی مظہر، جسٹس عائشہ ملک، جسٹس حسن اظہر رضوی، جسٹس مسرت ہلالی، جسٹس نعیم اختر افغان اور جسٹس شاہد بلال حسن شامل ہیں۔
اسی دوران سپریم کورٹ نے ملٹری کورٹس کیس کو بھی سماعت کے لیے 28 جنوری کو مقرر کردیا ہے۔ اس کیس کی سماعت سات رکنی آئینی بینچ کرے گا جس کی سربراہی بھی جسٹس امین الدین خان کریں گے۔
ذرائع کے مطابق سپریم کورٹ کے دفتر نے وکلاء کو بذریعہ ایس ایم ایس ان کیسز کے متعلق آگاہ کردیا ہے۔
علاوہ ازیں، سپریم کورٹ نے آئینی بینچ اور ریگولر بینچ کے دائرہ اختیار کے معاملے میں کیس سماعت کے لیے مقرر نہ کرنے پر رجسٹرار جوڈیشل کو شوکاز نوٹس جاری کیا ہے، اور اس سلسلے میں ویب سائٹ پر کاز لسٹ بھی جاری کردی گئی ہے۔
اس کیس کی سماعت جسٹس منصور علی شاہ اور جسٹس عقیل عباسی پر مشتمل دو رکنی بینچ کرے گا۔
مزید برآں، آج جسٹس منصور علی شاہ، جسٹس عائشہ ملک اور جسٹس عقیل عباسی پر مشتمل تین رکنی بینچ نے اسی معاملے پر سماعت کی۔