اسلام آباد:نوبیل انعام یافتہ ملالہ یوسف زئی لڑکیوں کی تعلیم سے متعلق کانفرنس میں شرکت کے لیے پاکستان پہنچ گئیں۔
پاکستان آمد پر پارلیمانی سیکریٹری برائے تعلیم نے ان کا پرتپاک استقبال کیا۔ ملالہ یوسف زئی کانفرنس میں شرکت کے دوران لڑکیوں کی تعلیم کے مسائل اور خواتین کی تعلیم کو درپیش چیلنجز پر تفصیلی گفتگو کریں گی۔
وزیر اعظم کی میزبانی میں ہونے والی ’’مسلم معاشروں میں خواتین کی تعلیم: چیلنجز اور مواقع‘‘ کے عنوان سے دو روزہ بین الاقوامی کانفرنس آج سے جناح کنونشن سینٹر میں شروع ہو رہی ہے۔ کانفرنس میں 44 ممالک کے 150 سے زائد وفود کی شرکت متوقع ہے۔
اس اہم کانفرنس کی میزبانی رابطہ العالم الاسلامی اور وزیر اعظم شہباز شریف مشترکہ طور پر کر رہے ہیں۔ کانفرنس کی افتتاحی تقریب میں وزیراعظم شہباز شریف شرکت کریں گے، جبکہ او آئی سی کے سیکریٹری جنرل حصین براہیم طحہ، نائب وزیراعظم اسحاق ڈار اور دیگر وزراء بھی اس تقریب کا حصہ ہوں گے۔
او آئی سی کے افغانستان کے لیے خصوصی نمائندے طارق بخیت اور دیگر اہم عہدیدار بھی کانفرنس میں موجود ہوں گے۔ اس کانفرنس کا بنیادی مقصد حکومتوں، اسلامی تنظیموں، اور سول سوسائٹی کے درمیان لڑکیوں کی تعلیم کے لیے مضبوط نیٹ ورک قائم کرنا ہے۔
