عمران خان اور بشریٰ بی بی کے خلاف ریفرنس پر فیصلہ 13 جنوری کو ہوگا

عمران خان اور بشریٰ بی بی کے خلاف ریفرنس پر فیصلہ 13 جنوری کو ہوگا

اسلام آباد:
عمران خان اور ان کی اہلیہ بشریٰ بی بی کے خلاف 190 ملین پاؤنڈز کے ریفرنس کا فیصلہ ایک بار پھر مؤخر کر دیا گیا ہے۔ جی ایچ کیو حملہ اور سانحہ 9 مئی سمیت 13 دیگر کیسز کی سماعت بھی 8 جنوری تک ملتوی کر دی گئی ہے۔

احتساب عدالت نے آج ریفرنس کا فیصلہ سنانے کی تاریخ مقرر کی تھی، لیکن جج ناصر جاوید رانا کی رخصت کے باعث فیصلہ نہیں سنایا جا سکا۔

عدالتی عملے نے عمران خان کے وکیل خالد یوسف چوہدری کو مطلع کیا کہ فیصلہ آج نہیں سنایا جائے گا، اور نئی تاریخ عدالت میں دی جائے گی۔ بعد میں بتایا گیا کہ اب یہ فیصلہ 13 جنوری کو سنایا جائے گا۔

یہ سماعت اڈیالہ جیل کے بجائے نیب کورٹ جی الیون میں ہوئی۔ تاہم، ملزمان کی حاضری ضروری ہونے کے باوجود عمران خان جیل میں ہونے کی وجہ سے جی الیون میں سماعت کے دوران موجود نہیں ہو سکے، جس کی وجہ سے فیصلہ مؤخر کر دیا گیا۔

جی ایچ کیو حملہ کیس اور دیگر مقدمات
جی ایچ کیو حملہ اور سانحہ 9 مئی سمیت 13 کیسز کی سماعت بھی ملتوی کر دی گئی۔ ان مقدمات کی سماعت اب 8 جنوری کو ہوگی۔

عدالتی جج امجد علی شاہ ٹریننگ کے باعث چھٹی پر تھے، جس کی وجہ سے اڈیالہ جیل میں کسی مقدمے کی سماعت نہ ہو سکی۔ تمام ملزمان کی آج کے لیے حاضری معاف کر دی گئی ہے۔