آج سے ملک کے مختلف علاقوں اور کل سے زیادہ تر علاقوں میں بارش اور پہاڑوں پر شدید برفباری کی پیش گوئی کی گئی ہے۔
محکمہ موسمیات نے اپنے بیان میں کہا ہے کہ ملک کے مغربی اور بالائی علاقوں میں گرج چمک کے ساتھ بارش اور برفباری ہوگی، آج سے 6 جنوری تک مغربی ہوائیں ملک میں داخل ہوں گی۔
محکمہ موسمیات کے مطابق، یکم جنوری سے 5 جنوری تک دیر، سوات، شانگلہ، اور مہند میں بارش اور برفباری کا امکان ہے۔ نوشہرہ، صوابی، کرک، بنوں، اور کوہاٹ میں بھی بارش اور برفباری متوقع ہے۔
محکمہ موسمیات کا کہنا ہے کہ خیبر پختونخوا کے بیشتر اضلاع میں موسم سرد و خشک رہے گا، جبکہ بالائی اضلاع میں شدید سردی ہوگی۔ چترال، دیر، سوات، کالام، باجوڑ، مانسہرہ، کوہستان، شمالی و جنوبی وزیرستان میں بعض مقامات پر ہلکی بارش اور پہاڑوں پر برفباری کا امکان ہے۔
محکمہ نے کہا کہ خیبر پختونخوا کے میدانی علاقوں میں دھند پڑ سکتی ہے۔ پشاور کا کم سے کم درجہ حرارت گزشتہ روز 01 ڈگری سینٹی گریڈ ریکارڈ کیا گیا، چترال لوئر اور کالام میں منفی چار، دیر بالا میں منفی تین، پاراچنار، مالم جبہ میں منفی دو، سیدو شریف سوات اور دیر لوئر تیمرگرہ میں منفی ایک، جبکہ رسالپور نوشہرہ کا کم سے کم درجہ حرارت صفر تک گر گیا۔
محکمہ موسمیات کے بیان کے مطابق مری اور گلیات میں وقفے وقفے سے بارش اور برفباری کا امکان ہے۔ 2 سے 6 جنوری تک اسلام آباد، پوٹھوہار، سگردھا، خوشاب، ناروال سمیت سینٹرل پنجاب کے شہروں میں بارش کی توقع ہے۔
بیان میں کہا گیا کہ 2 سے 5 جنوری تک جنوبی پنجاب کے مختلف شہروں میں بارش کا امکان ہے۔ بلوچستان میں یکم سے 4 جنوری تک چمن، پشین، قلعہ عبداللہ، چاغی، نوشکی، قلات، اور ہرنائی میں بارش اور برفباری متوقع ہے۔
محکمہ موسمیات نے کہا کہ 3 سے 4 جنوری کے دوران بالائی سندھ میں بارش کا امکان ہے۔
