سرکاری ہسپتالوں میں تھری کلر بیڈ شیٹس کا نظام نافذ کرنے کا فیصلہ

وزیر پرائمری و سیکنڈری ہیلتھ کیئر ڈاکٹر جمال ناصر نے بتایا ہے کہ یکم جنوری سے پنجاب کے سرکاری ہسپتالوں میں بیڈ شیٹس کا نیا نظام نافذ کیا جا رہا ہے۔صفائی یقینی کے لئے سرکاری ہسپتالوں میں بیڈ شیٹس روزانہ تبدیل کی جائیں گی۔ اس مقصد کے لئے تمام ڈسٹرکٹ ہیڈکوارٹر ہسپتالوں کو ہربستر کے لئے سات بیڈ شیٹس مہیا کی جائیں گی جو تین رنگوں کی ہوں گی۔ہر دن مختلف رنگ کی بیڈ شیٹ بچھائی جائے گی۔

تمام تحصیل ہیڈکوارٹر ہسپتالوں میں بھی تھری کلر بیڈ شیٹس کا نظام 15 جنوری سے شروع کر دیا جائے گا۔ ایمرجنسی وارڈز کے لئے ڈسپوزیبل بیڈ شیٹس استعمال کی جائیں گی۔ وزیر پرائمری و سیکنڈری ہیلتھ کیئر ڈاکٹر جمال ناصر کی زیر صدارت پنجاب کے تحصیل ہیڈکوارٹر ہسپتالوں کی ماہانہ کارکردگی کا جائزہ اجلاس منعقد ہوا جس میں سیکرٹری ہیلتھ علی جان خان نے پنجاب کے 135 تحصیل ہیڈکوارٹر ہسپتالوں کی ماہانہ کارکردگی کا جائزہ لیا۔اس موقع پر ڈاکٹر جمال ناصر نے ہدایت کی کہ تحصیل ہیڈکوارٹر ہسپتالوں میں ایکسرے رومز اور لیبارٹری رات کو بھی آپریشنل رکھی جائیں۔انہوں نے بتایا کہ سرکاری ہسپتالوں کی ری ویمپنگ کے لئے بجٹ مہیا کیا جا چکا ہے۔

سرکاری ہسپتالوں کی ری ویمپنگ ایک ماہ کے اندر اندر مکمل کر لی جائے گی۔تمام ایم ایس روزانہ ایک سے زیادہ مرتبہ اپنے ہسپتال کا راو ¿نڈ کریں۔ سرکاری ہسپتالوں میں ادویات اور آلات کی کمی نہیں، ڈاکٹر جذبہ خدمت سے کام کریں۔ وزیر اعلیٰ محسن نقوی تمام وسائل مہیا کر رہے ہیں، شہریوں کو بہتر علاج مہیا کرنا ڈاکٹروں کی ذمہ داری ہے۔ اس موقع پر سیکرٹری ہیلتھ پنجاب علی جان خان نے کہا کہ تحصیل ہیڈکوارٹر ہسپتالوں میں بجلی کا ڈبل کنکشن لگوانے کے اقدامات کئے جائیں۔محکمہ صحت کا عملہ مریضوں کی کیئر، کمفرٹ اور سروس کے بنیادی اصولوں پر کام کرے۔ اجلاس میں سپیشل سیکرٹری محمد اقبال، ایڈیشنل سیکرٹری خضر افضال اور راشد ارشاد، ڈی جی ہیلتھ ڈاکٹر الیاس گوندل اور ڈی جی ڈرگز محمد سہیل نے بھی شرکت کی۔