صوبائی دارالحکومت کو سموگ سے نجات نہ مل سکی، لاہور فضائی آلودگی کے اعتبار سے دنیا بھر کے شہروں میں آج بھی دوسرے نمبر پرہے۔ شہر کا اوسط ایئرکوالٹی انڈیکس 308 ریکارڈ کیا گیا ہے، مال روڈ کا اے کیو آئی308 اور عامر ٹاؤن میں 356 رہا۔ محکمہ موسمیات کا کہنا ہے کہ لاہور کا درجہ حرارت آج کم سے کم 13 جبکہ زیادہ سے زیادہ 26 ڈگری سینٹی گریڈ تک جا سکتا ہے جبکہ شہر میں فی الحال بارش کا کوئی امکان نہیں۔ فضائی آلودگی میں اضافے کے باعث شہریوں کو خشک کھانسی اور سانس لینے میں دشواری جیسے مسائل کا سامنا کرنا پڑرہا ہے۔
گزشتہ 2 روز میں شہر کے 5 بڑے ہسپتالوں میں سموگ سے متاثرہ 2 ہزار سے زائد مریض رپورٹ ہوئے۔ جناح ہسپتال میں900 ،میو ہسپتال 850 جبکہ گنگارام میں700 مریض رپورٹ ہوئے اس کے علاوہ متعدد مریضوں نے سروسزاور جنرل ہسپتال کا بھی رخ کیا۔
دوسری جانب ایڈیشنل آئی جی ٹریفک پنجاب مرزا فاران بیگ کے احکامات پر صوبہ بھر میں سموگی وہیکل کیخلاف کاروائیوں کا سلسلہ جاری ہے۔ ترجمان پنجاب ٹریفک پولیس کے مطابق صوبہ بھر میں رواں سال دھواں دینے والی4 لاکھ 19 ہزار سے زائد گاڑیوں کو چالان کئے، 10 اکتوبر سے شروع ہونے سموگ کمپین کی تحت ٹریفک پولیس نے آج تک 2 لاکھ سے زائد چلان کئے۔ دھواں دینے والی 80 ہزار سے زائد گاڑیوں کو بند کروایا گیا، دھواں دینے والی 5 ہزار سے زائد گاڑیوں کے فٹنس سرٹیفیکیٹ معطل کیے ۔جبکہ 200 سے زائد گاڑیوں کےخلاف ایف آئی آر بھی درج کروائی گئی۔
