شور شرابے والے ماحول میں بلڈ پریشر چیک کرنا کتنا درست؟
اگر آپ کسی بازار یا رش والی جگہ پر بلڈ پریشر چیک کر رہے ہیں تو شور کی وجہ سے پریشان ہونے کی ضرورت نہیں، کیونکہ تحقیق کے مطابق اس سے بلڈ پریشر کی ریڈنگ پر زیادہ فرق نہیں پڑتا۔
ایک نئی تحقیق میں پایا گیا ہے کہ پبلک مقامات اور پُرسکون دفاتر میں لیے گئے بلڈ پریشر کے نتائج تقریباً ایک جیسے ہوتے ہیں۔
پہلے یہ سمجھا جاتا تھا کہ بلڈ پریشر چیک کرنے کے لیے پُرسکون جگہ ضروری ہے، لیکن نئی تحقیق کے مطابق رش والی جگہوں پر بھی بلڈ پریشر صحیح طور پر چیک کیا جا سکتا ہے۔
جانز ہاپکنز یونیورسٹی کے ماہرین کا کہنا ہے کہ اس تحقیق سے عوامی مقامات پر بڑے پیمانے پر بلڈ پریشر چیکنگ کے منصوبے بنانے میں مدد مل سکتی ہے۔
دنیا بھر میں تقریباً 1.4 ارب لوگ ہائی بلڈ پریشر کے مریض ہیں، مگر ان میں سے صرف 50 فیصد کو اپنی بیماری کا علم ہوتا ہے اور صرف 20 فیصد ہی اسے کنٹرول کر پاتے ہیں۔
یہی وجہ ہے کہ دل کی بیماری دنیا میں سب سے زیادہ اموات کا سبب بن رہی ہے۔ اگر بلڈ پریشر چیک کروانے کو آسان اور عام کر دیا جائے تو دل کی بیماریوں کے خطرے کو کم کیا جا سکتا ہے۔
