اداکارہ یمنیٰ زیدی کی ویڈیو وائرل ہو گئی

تیرے بن ڈرامے میں اپنی اداکاری کے جوہر دکھا کر مشہور ہونے والی پاکستانی اداکارہ یمنیٰ زیدی کی نئی ڈانس ویڈیو نے سوشل میڈیا پر دھوم مچا دی ہے۔ تفصیلات کے مطابق یمنیٰ زیدی نے قریبی رشتہ دار کی شادی میں ڈانس کیا جس کی ویڈیو سوشل میڈیا پر وائرل ہو گئی۔ ویڈیو میں دیکھا جا سکتا ہے کہ یمنیٰ زیدی نے سرخ رنگ کا کامدار جوڑا پہن رکھا ہے۔ جوڑے پر گولڈن کلر کا کام ہوا ہے اور اداکارہ انتہائی مہارت سے خوبصورت رقص پیش کر رہی ہیں۔

اداکارہ نے اپنے ٹویٹر اکاؤنٹ پر اپنے ڈانس کی ویڈیو شئیر کی جو کے دیکھتے ہی دیکھتے وائرل ہوگئی اور مداحوں نے انہیں خوب سراہا ہے۔ یمنیٰ زیدی نے شادی کی تقریب میں اپنی آنے والی ڈیبیو فلم نایاب کے ایک گانے شیندی پر ڈانس کیا جسے شادی میں موجود مہمانوں کی جانب سے بھی بہت پسند کیا گیا۔ اداکارہ نے اپنی ویڈیو پوسٹ کرتے ہوئے لکھا کہ یہ میری نئی آنے والی فلم نایاب کا میرا پسندیدہ دیسی ڈانس ہے۔

اداکارہ کے مداحوں کے ساتھ ساتھ شوبز سیلیبرٹیز  نے بھی یمنیٰ زیدی کی ڈانس ویڈیو پر کمنٹ کرتے ہوئے اُن کی خوبصورتی اور رقص کی خوب تعریف کی ہے۔ یمنیٰ زیدی کی فلم نایاب 26 جنوری کو پاکستان کے تمام سنیما گھروں کی زینت بنے گی۔ اس فلم میں یمنیٰ نے نایاب نامی لڑکی کا کردار ادا کیا ہے جسے بچپن سے ہی کرکٹ کھیلنے کا شوق ہوتا ہے۔