سعدیہ امام نے اپنی شادی پر کسٹمر کا جوڑا کیوں پہنا؟ دلچسپ کہانی سامنے آئی
اداکارہ سعدیہ امام نے انکشاف کیا ہے کہ ان کی شادی کا جوڑا تیار ہوتے وقت جل گیا تھا جس کی وجہ سے انہیں اپنی شادی کے موقع پر کسی اور کا جوڑا پہننا پڑا۔ سعدیہ امام نے ایک نجی ٹی وی کے مارننگ شو میں شرکت کے دوران اپنی شادی سے متعلق گفتگو کرتے ہوئے بتایا کہ وہ کپڑوں کا کام کرتی تھیں اور شادی کے جوڑے پر کام ہو رہا تھا، کہ اس دوران شاٹ سرکٹ کے باعث پورا کارخانہ جل گیا اور ان کا شادی کا جوڑا بھی اس حادثے کی زد میں آ گیا۔
انہوں نے کہا کہ یہ جوڑا ان کی والدہ کے پسندیدہ رنگ کا تھا اور انہیں اس نقصان پر بے حد افسوس ہوا۔ سعدیہ امام نے مزید بتایا کہ انہوں نے اپنی ایک کسٹمر کو ویسا ہی جوڑا تیار کر کے دیا تھا جو اس لڑکی نے اپنی شادی پر پہننا تھا۔ سعدیہ امام نے کہا کہ انہوں نے کسٹمر سے اس جوڑے کی تصویر مانگی تاکہ ویسا ہی نیا جوڑا بنوا سکیں، جس پر اس لڑکی نے انہیں مشورہ دیا کہ آپ میرا جوڑا پہن لیں کیونکہ میری شادی کی تاریخ آپ کے بعد ہے۔
اداکارہ سعدیہ امام نے کہا کہ اس طرح انہوں نے اپنی شادی پر اس لڑکی کا جوڑا پہنا اور بعد میں اس کسٹمر کے لیے ویسا ہی نیا جوڑا تیار کروا کر دے دیا۔
