بھارت میں ورلڈکپ فائنل دیکھتے ہوئے ٹی وی بند کرنے پر باپ نے بیٹے کو قتل کر دیا

بھارت میں ورلڈکپ فائنل دیکھتے ہوئے ٹی وی بند کرنے پر باپ نے بیٹے کو قتل کردیا۔ تفصیلات کے مطابق یہ واقعہ کان پور میں پیش آیا جہاں گنیش پرساد نامی شخص گھر پر آئی سی سی ورلڈکپ 2023 کا فائنل میچ دیکھ رہا تھا کہ اسی دوران اس کے بیٹے دیپکپرساد  نے باپ سے پہلے کھانا بنانے کی درخواست کی جس پر باپ نے انکار کیا تو بیٹے نے ٹی وی بند کردیا۔ بیٹے کے ٹی وی بند کرنے پر باپ بیٹے کی تکرار ہوئی اور بات ہاتھا پائی تک جا پہنچی جس پر باپ نے موبائل فون چارجر کے تار سے بیٹے کا گلا گھونٹ دیا اور اسکا بیٹا موقع پر ہی جانبحق ہوگیا۔

کانپور پولیس کا کہنا ہے کہ قتل کے واقعے کی اطلاع ملتے ہی پولیس نے جائے وقوعہ پر پہنچ کر ملزم کو گرفتار کر لیا۔ رپورٹ کے مطابق ملزم اس وقت شراب کے نشے میں تھا، پولیس کو ملزم کے پڑوسیوں نے اطلاع دی تھی، پولیس جب پہنچی تو نوجوان کی لاش سیڑھیوں پر پڑی تھی جسے فوری طور پر اسپتال منتقل کردیا گیا۔ پولیس نے مزید بتایا ہے کہ ملزم کی بیوی گزشتہ ہفتے ہی مار پیٹ کے بعد گھر چھوڑ کر چلی گئی تھی۔