پاکستان مخالف بھارتی سازش پکڑی گئی، انسانی اسمگلنگ میں ملوث گروہ گرفتار

پاکستان مخالف بھارتی سازش پکڑی گئی، انسانی اسمگلنگ میں ملوث گروہ گرفتار

لاہور: قانون نافذ کرنے والے اداروں کو بڑی کامیابی حاصل ہوئی ہے جب انسانی اسمگلنگ میں ملوث ایک بین الاقوامی گروہ کو لاہور میں کارروائی کے دوران گرفتار کیا گیا۔ انٹیلی جنس ایجنسیوں کی فراہم کردہ معلومات پر ایف آئی اے لاہور سرکل کی ٹیم نے کامیاب کارروائی کی اور اس نیٹ ورک کو رنگے ہاتھوں پکڑ لیا۔

یہ نیٹ ورک سادہ لوح افراد کو بیرون ملک روزگار کا جھانسہ دے کر ان سے بھاری رقوم وصول کرتا تھا۔ گروہ نے بے شمار معصوم لوگوں کو روزگار کے خواب دکھا کر کروڑوں روپے بٹورے اور جعلی دستاویزات کی تیاری میں ماہر تھا۔کارروائی کے دوران گروہ کے پاس سے جعلی دستاویزات تیار کرنے کے لیے اپنا پرنٹنگ پریس بھی برآمد کیا گیا، جس میں مختلف ممالک کی جعلی سفری اور شناختی دستاویزات تیار کی جاتی تھیں۔ اس گروہ کی مہارت میں جعلی ویزے، پاسپورٹ اور دیگر قانونی دستاویزات بنانا شامل تھا۔

تفتیش کے دوران یہ انکشاف ہوا کہ اس مجرمانہ گروہ کی سرگرمیوں میں بھارتی اور افغان باشندے بھی ملوث ہیں، جو مختلف طریقوں سے پاکستان کو بدنام کرنے کی کوشش کر رہے تھے۔ اس گروہ کا رابطہ انٹرنیشنل ڈنکی گروہوں سے بھی تھا، جو غیر قانونی طریقے سے لوگوں کو مختلف ممالک میں بھیجتے ہیں۔یہ بھی معلوم ہوا کہ کچھ افراد، جو بیرون ملک سیاسی پناہ لینے کے خواہشمند تھے، بھی اس گروہ کی مدد حاصل کرتے تھے تاکہ وہ جعلی دستاویزات کے ذریعے پناہ حاصل کر سکیں۔
دورانِ تفتیش بھارتی سازش بھی بے نقاب ہوئی جس میں بھارت پاکستان کو عالمی سطح پر بدنام کرنے کی کوشش کر رہا تھا۔ بھارتی باشندے اس گروہ کے ساتھ مل کر پاکستان کے تشخص کو خراب کرنے کی سازش میں مصروف تھے۔گروہ کی گرفتاری:ایف آئی اے نے گروہ کے متعدد افراد کو گرفتار کر لیا ہے اور ان سے تفتیش جاری ہے۔

ایف آئی اے حکام کا کہنا ہے کہ اس نیٹ ورک کی گرفتاری سے نہ صرف انسانی اسمگلنگ کے بڑے نیٹ ورک کو بے نقاب کیا گیا ہے، بلکہ یہ بھی معلوم ہوا ہے کہ پاکستان مخالف سرگرمیوں میں ملوث عناصر کو بھی پکڑا جا رہا ہے۔یہ کاروائی ایک اہم کامیابی سمجھی جا رہی ہے جس سے پاکستان میں انسانی اسمگلنگ کی روک تھام میں مدد ملے گی اور ملک کو عالمی سطح پر بدنام کرنے کی بھارتی کوششوں کا بھی پردہ چاک ہوا ہے۔