لاہور میں ہنی ٹریپ کا نیا واقعہ: لڑکی نے نوجوان سے رقم اور قیمتی سامان لوٹ لیا
لاہور میں ایک نوجوان، حمزہ، ایک ہنی ٹریپ کے ذریعے بڑی مالی نقصان کا شکار ہو گیا۔ حمزہ کی کچھ عرصہ قبل ایک لڑکی سے دوستی ہوئی تھی۔ لڑکی نے حمزہ کو ناشتے کے لیے اپنے فلیٹ پر مدعو کیا۔
حمزہ جب لڑکی کے فلیٹ پر پہنچا تو ناشتہ ٹیبل پر لگایا جا رہا تھا۔ اسی دوران تین نامعلوم افراد فلیٹ میں داخل ہوئے اور حمزہ کو گن پوائنٹ پر یرغمال بنا لیا۔ ان افراد نے حمزہ کو شدید تشدد کا نشانہ بنایا جبکہ لڑکی اس تمام واقعے کی ویڈیو بناتی رہی۔
لڑکی نے حمزہ کا موبائل فون لے کر اس سے بینک اکاؤنٹ کا پاسورڈ مانگا اور 66 ہزار روپے اپنے اکاؤنٹ میں منتقل کروا لیے۔ اس کے بعد ان لوگوں نے حمزہ سے قیمتی فون اور پرس بھی چھین لیا، جس میں مزید 14 ہزار روپے موجود تھے۔
کاہنہ پولیس نے حمزہ کی شکایت پر مقدمہ درج کر لیا ہے اور لڑکی سمیت ہنی ٹریپ گینگ کے تین افراد کو گرفتار کر لیا ہے، جبکہ ایک ملزم فرار ہونے میں کامیاب ہو گیا۔ پولیس نے ملزمان سے ویڈیوز برآمد کر لی ہیں اور مزید تحقیقات جاری ہیں۔
