ساتھیوں پر ہراسانی کے جھوٹے الزامات لگانے پر لیڈی پولیس کانسٹیبل برطرف۔

کراچی – گارڈن تھانے کی لیڈی پولیس کانسٹیبل کو ساتھی ملازمین پر ہراسانی کے جھوٹے الزامات لگانے پر ملازمت سے برطرف کر دیا گیا۔ تفصیل کے مطابق لیڈی کانسٹیبل نے دو پولیس اہلکاروں پر ہراساں کرنے کا الزام عائد کیا تھا اور براہ راست آئی جی سندھ کے شکایتی سیل میں درخواست جمع کرائی تھی۔ ایس ایس پی سٹی عارف عزیز کے مطابق معاملے کی تحقیقات ڈی ایس پی گارڈن نے کیں۔ جس میں دیگر لیڈی کانسٹیبلز نے الزامات کو غلط قرار دیا۔ تحقیقات کے بعد انکوائری رپورٹ کی روشنی میں لیڈی کانسٹیبل کو نوکری سے برخاست کر دیا گیا۔ اس کیس میں لیڈی اہلکار کی مدد کرنے والے سب انسپکٹر کو بھی عہدے میں تنزلی کا سامنا کرنا پڑا، جبکہ ان کا تبادلہ بھی کر دیا گیا۔

برطرف ہونے والی لیڈی کانسٹیبل نے فیصلے کو ناانصافی قرار دیتے ہوئے کہا کہ وہ اسے چیلنج کریں گی۔