پاکستان میں بنائی گئی پہلی ہائبرڈ الیکٹرک گاڑی لانچ کردی گئی

پاکستان میں بنائی گئی پہلی ہائبرڈ الیکٹرک گاڑی لانچ کردی گئی ہے۔ کئی ماہ سے جاری افواہوں اور لیکس کے بعد آخر کار پاکستان کی معروف کار ساز کمپنی انڈس موٹر کمپنی نے ’’کرولا کراس‘‘ لانچ کردی ہے۔ اس گاڑی کو پاکستان میں تیار کیا گیا ہے۔  ٹیوٹا نے اپنی پہلی مقامی سطح پر اسمبل کی گئی گاڑی ’’ کرولا کراس‘‘ کراچی میں ہونے والی ایک تقریب میں متعارف کروائی  ، تقریب میں حکومتی ، کاروباری اور ٹیوٹا کے سینئر افسران نے شرکت کی۔

تقریب سے خطاب کرتے ہوئے انڈس موٹر کمپنی کے چیئرمین محمد علی نے اپنے تمام سٹیک ہولڈرز کا تعاون پر شکریہ ادا کیا اور انہوں نے پاکستان کے ساتھ جاپان کی گہری دوستی پر بھی روشنی ڈالی ، اس کامیابی کو سنگ میل قرار دیا۔

ٹویوٹا کی ایمرجنگ مارکیٹ کمپیکٹ کار کمپنی کے صدر اور ٹویوٹا ڈائی ہاٹسو انجینئرنگ اینڈ مینوفیکچرنگ کے ایگزیکٹو نائب صدر یوشیوکی تاکائی نے ایشیائی ممالک میں صارفین کے ایچ ای وی کا انتخاب کرنے کے بڑھتے ہوئے رجحان پر روشنی ڈالی۔ انہوں نے مزید کہا کہ کمپنی کو امید ہے کہ پاکستانی صارفین دیگر مارکیٹوں کی طرح ‘کرولا کراس ایچ ای وی’ کو ایک پرکشش، موثر گاڑی کے طور پر پسند کریں گے۔

ٹویوٹا کرولا کراس 2024کی پاکستان میں قیمت کا تخمینہ 12,000,000 روپے سے شروع ہوتا ہے۔ یہ تخمینہ شدہ قیمت ایکس ​​فیکٹری ہے اور اس میں فریٹ ، ٹیکس اور دیگر دستاویزات کے اخراجات شامل نہیں ہیں۔