کراچی(ویب ڈیسک) ملک میں اشیائے ضروریہ کی قیمتوں پر قابو پانے کے لیے کام کرنے کے حکومتی دعوؤں کے باوجود چینی کی قیمت میں اضافہ جاری ہے اور اب یہ پیٹرول کی قیمت کو بھی عبور کر چکی ہے۔
مختلف شہروں میں چینی 150 روپے فی کلو تک فروخت ہو رہی ہے جبکہ ملک میں اس وقت پیٹرول 138 روپے 30 پیسے فی لیٹر فروخت ہو رہا ہے۔
پشاور
پشاور کی ہول سیل مارکیٹ میں چینی کی قیمت میں 8 روپے فی کلو اضافہ ہوگیا۔
شوگر ڈیلرز ایسوسی ایشن کے صدر کا کہنا ہے کہ چینی ہول سیل 140 روپے فی کلو کے حساب سے فروخت ہو رہی ہے جبکہ پرچون قیمت 145 روپے سے بڑھ کر 150 روپے فی کلو ہو گئی ہے۔
لاہور میں منافع خوری کے لیے مصنوعی قلت
ادھر لاہور میں گزشتہ روز ہول سیل مارکیٹ میں چینی کی قیمت 126 روپے فی کلو تھی اور ذرائع کا کہنا ہے کہ چینی ڈیلرز نے ناجائز منافع کمانے کے لیے مصنوعی قلت پیدا کر کے قیمت میں اضافہ کیا ہے۔
مارکیٹ ذرائع کا کہنا ہے کہ ہول سیل مارکیٹ میں چینی کی قیمت میں 9 روپے فی کلو اضافہ ہوا ہے۔ اکبری منڈی میں چینی کی قیمت 135 روپے فی کلو تک پہنچ گئی جب کہ پرچون میں چینی 140 روپے فی کلو فروخت ہو رہی ہے۔
کراچی میں ایکس مل چینی کی قیمت تاریخ کی بلند ترین سطح پر پہنچ گئی
کراچی میں چینی کی ایکس مل قیمت اب تاریخ کی بلند ترین سطح 142 روپے فی کلو پر پہنچ گئی ہے جو ایک روز قبل کے مقابلے میں 12 روپے اضافے سے ہے۔
دو ہفتوں میں چینی کی ایکس مل قیمت 44 روپے فی کلو بڑھ گئی ہے۔
ایکس مل قیمت میں اضافے سے چینی کی ہول سیل قیمت 143 روپے فی کلو تک پہنچ گئی ہے، صرف دو دنوں کے دوران اس کی قیمت میں 19 روپے کا اضافہ ہوا ہے۔ اور خوردہ سطح پر، قیمت میں اضافے کا اثر چینی کی تمام خریداریوں پر پڑے گا۔
کوئٹہ میں چینی کی قیمت میں 5 روپے کا اضافہ
ایسی ہی صورتحال کوئٹہ میں دیکھنے کو مل رہی ہے جہاں چینی کی قیمت 124 روپے سے بڑھ کر 129 روپے فی کلو تک پہنچ گئی ہے۔
