رواں مالی سال 2024-25 کے پہلے سات ماہ (جولائی تا جنوری) میں ملک کی برآمدات، درآمدات اور تجارتی خسارے میں اضافہ ریکارڈ کیا گیا ہے۔وفاقی ادارہ شماریات کے جاری کردہ اعدادوشمار کے مطابق، جنوری میں برآمدات 4.59 فیصد سالانہ اور 0.31 فیصد ماہانہ اضافے کے ساتھ 2 ارب 92 کروڑ ڈالر تک پہنچ گئیں۔ رواں مالی سال کے ابتدائی سات ماہ میں برآمدات میں مجموعی طور پر 9.98 فیصد اضافہ دیکھنے میں آیا، جس سے ان کا حجم 19 ارب 55 کروڑ 10 لاکھ ڈالر تک پہنچ گیا۔
رپورٹ کے مطابق، جنوری میں سالانہ بنیادوں پر درآمدات میں اضافہ ہوا، تاہم دسمبر 2024 کے مقابلے میں جنوری 2025 میں درآمدات میں کمی آئی اور ان کا حجم 5 ارب 23 کروڑ 30 لاکھ ڈالر رہا۔ پہلے سات ماہ میں درآمدات 6.95 فیصد اضافے کے ساتھ 33 ارب ڈالر سے تجاوز کر گئیں۔
تجارتی خسارے کے حوالے سے رپورٹ میں بتایا گیا کہ جنوری 2025 میں سالانہ بنیادوں پر خسارہ 17.78 فیصد بڑھا، جبکہ ماہانہ بنیادوں پر 5.47 فیصد کمی ہوئی، جس کے بعد اس کا حجم 2 ارب 31 کروڑ 30 لاکھ ڈالر ریکارڈ کیا گیا
