پٹرول ایک روپے، ڈیزل 7 روپے مہنگا
وفاقی حکومت نے تیسری بار پیٹرول اور ڈیزل کی قیمتوں میں اضافہ کر دیا ہے۔ خزانہ ڈویژن کے نوٹیفکیشن کے مطابق، پیٹرول کی قیمت میں ایک روپے اور ہائی اسپیڈ ڈیزل کی قیمت میں سات روپے فی لیٹر کا اضافہ کیا گیا ہے۔
اب پیٹرول کی نئی قیمت 257 روپے 13 پیسے فی لیٹر ہو گئی ہے، جبکہ ہائی اسپیڈ ڈیزل 267 روپے 95 پیسے فی لیٹر ہو گیا ہے۔
حکومت کا کہنا ہے کہ آئل اینڈ گیس ریگولیٹری اتھارٹی (اوگرا) نے بین الاقوامی مارکیٹ میں قیمتوں کے اتار چڑھاؤ کو دیکھتے ہوئے یہ فیصلہ کیا ہے۔
یاد رہے کہ اس سے پہلے 31 دسمبر کو بھی پیٹرول کی قیمت میں 56 پیسے فی لیٹر کا اضافہ کیا گیا تھا۔ پھر 15 جنوری کو پیٹرول کی قیمت میں مزید 3 روپے 47 پیسے اور ڈیزل کی قیمت میں 2 روپے 61 پیسے کا اضافہ کیا گیا تھا۔
یہ مسلسل اضافے عوام کے لیے مہنگائی کے بوجھ کو اور بڑھا رہے ہیں۔
