سیاحت سے پاکستان کو کتنے امریکی ڈالر کا فائدہ ہورہا ہے؟
اسلام آباد : آج پاکستان سمیت دنیا بھر میں سیاحت کا عالمی دن منایا جا رہا ہے، جو 1970ء سے اقوامِ متحدہ کی جنرل اسمبلی کی قرارداد کے تحت منایا جا رہا ہے۔ یہ دن ورلڈ ٹورازم آرگنائزیشن کی ایگزیکٹو کونسل کی سفارشات پر منایا جاتا ہے۔ پاکستان، تاریخی اور مذہبی سیاحتی مقامات اور قدرتی حسن سے مالا مال ایک خوبصورت ملک ہے، جو دنیا بھر کے سیاحوں کے لیے ہمیشہ ایک مرکزِ توجہ رہا ہے۔
سیاحت کے فروغ کے لیے حکومت پاکستان نے بڑا قدم اٹھاتے ہوئے اوپن ویزا پالیسی متعارف کرائی ہے، جس کے تحت 126 ممالک کے سیاحوں کو 48 گھنٹے میں مفت ویزا فراہم کیا جا رہا ہے۔ اس سال پاکستان میں اندرونِ ملک سیاحت میں 30 سے 40 فیصد تک اضافہ دیکھا گیا، جب کہ بیرونِ ملک سے آنے والے سیاح پاکستانی معیشت میں 1.6 ملین امریکی ڈالر کا حصہ ڈال رہے ہیں۔
رواں سال سیاحت کا عالمی دن "ٹورزم اینڈ پیس” کے عنوان سے منایا جا رہا ہے، جس کی مناسبت سے اسلام آباد میں ایک بین الاقوامی ٹورزم انویسٹمنٹ ایکسپو کا انعقاد کیا گیا۔ اس ایکسپو میں پاکستان کے سیاحت سے منسلک مختلف کمپنیوں اور افراد نے شرکت کی اور ملک میں سیاحت اور ثقافت کے فروغ کے عزم کا اظہار کیا۔ اس کے علاوہ، ایکسپو میں ملائیشیا، ترکمانستان، آذربائیجان اور دیگر ممالک کے سفارتخانوں نے بھی اپنی سیاحتی صنعتوں کا تعارف کروایا۔
