بیل آؤٹ پیکج کی منظوری، روپے کے مقابلے میں ڈالر کو جھٹکا
کراچی :پاکستانی روپے کے مقابلے میں امریکی ڈالر کی قدر میں مسلسل کمی کا سلسلہ جاری ہے، جس کے نتیجے میں انٹربینک میں ڈالر کی قیمت مزید 34 پیسے کم ہوگئی ہے۔ اسٹیٹ بینک آف پاکستان کے مطابق کاروباری ہفتے کے چوتھے دن ڈالر کی قیمت میں 34 پیسے کی کمی واقع ہوئی، جس کے بعد ڈالر کی قدر 277 روپے 50 پیسے پر آگئی۔ یاد رہے کہ گزشتہ روز بدھ کو ڈالر کی قیمت میں 5 پیسے کا معمولی اضافہ ہوا تھا اور انٹربینک میں ڈالر 277 روپے 85 پیسے پر بند ہوا تھا۔
عالمی مالیاتی فنڈ (آئی ایم ایف) کی جانب سے 7 ارب ڈالر کے بیل آؤٹ پیکج کی منظوری کے بعد پاکستان اسٹاک ایکسچینج میں بھی تیزی کا رجحان دیکھنے میں آ رہا ہے۔ کاروباری ہفتے کے چوتھے روز اسٹاک مارکیٹ میں مثبت رجحانات کا تسلسل برقرار ہے اور ابتدائی کاروبار کے دوران پاکستان اسٹاک مارکیٹ میں 600 پوائنٹس کا نمایاں اضافہ ریکارڈ کیا گیا، جس کے ساتھ 100 انڈیکس 82,800 پوائنٹس کی سطح پر ٹریڈ کر رہا ہے۔
اس سے قبل، گزشتہ روز بھی پاکستان اسٹاک مارکیٹ کا کاروبار مثبت زون میں بند ہوا تھا، جس کے باعث 100 انڈیکس میں 764 پوائنٹس کا اضافہ ہوا اور یہ 82,247 پوائنٹس کی سطح پر بند ہوا تھا۔
