فوت شدہ افرادکی سمیں بند کرنے کی تاریخ کا اعلان
اسلام آباد: پاکستان ٹیلی کمیونی کیشن اتھارٹی (پی ٹی اے) نے فیصلہ کیا ہے کہ 15 اکتوبر سے ان تمام سموں کو بلاک کر دیا جائے گا جو فوت شدہ افراد کے شناختی کارڈز پر جاری کی گئی ہیں۔
پی ٹی اے کے جاری کردہ اعلامیہ میں کہا گیا ہے کہ جو افراد فوت شدہ افراد کے شناختی کارڈ پر جاری شدہ سمیں استعمال کر رہے ہیں، وہ فوری طور پر اپنی سمیں اپنے نام منتقل کروا لیں۔ مقررہ تاریخ کے بعد ایسی تمام سمیں بلاک کر دی جائیں گی جو اب بھی فوت شدہ افراد کے کمپیوٹرائزڈ قومی شناختی کارڈز پر رجسٹرڈ ہیں۔
اعلامیہ میں مزید کہا گیا ہے کہ ان سموں کے صارفین کو ہدایت کی جاتی ہے کہ وہ جلد از جلد اپنی سمیں اپنے نام منتقل کروا لیں۔ سم کی منتقلی کے لیے صارفین کو اپنے فوت شدہ عزیز کا اصل ڈیتھ سرٹیفکیٹ اور فوت شدہ شخص کے ساتھ رشتے کے ثبوت کی کاپی قریبی فرنچائز پر جمع کروانی ہوگی۔ متعلقہ فرنچائز تمام دستاویزات کی تصدیق کے بعد سم کو فوت شدہ شخص کے سی این آئی سی سے منتقل کر کے قریبی عزیز کے نام پر رجسٹرڈ کرے گی۔
