دو محبت کی شادیاں اور تین بیٹیاں ہیں، تیسری شادی کا کوئی ارادہ نہیں۔فواد چوہدری
اسلام آباد: سابق وفاقی وزیر فواد چوہدری نے حال ہی میں ایک ڈیجیٹل پلیٹ فارم یوٹیوب کے لیے پوڈکاسٹ انٹرویو میں اپنی زندگی کے مختلف پہلوؤں پر روشنی ڈالی۔ انٹرویو کے دوران فواد چوہدری نے انکشاف کیا کہ انہوں نے دو محبت کی شادیاں کی ہیں اور ان سے تین بیٹیاں ہیں۔ ان کا کہنا تھا کہ تیسری شادی کا کوئی ارادہ نہیں ہے۔
فواد چوہدری نے بتایا کہ وہ اس وقت سیاست سے دور ہیں اور اپنے ایک تعلیمی پروجیکٹ میں مصروف ہیں۔ ان کا کہنا تھا کہ ملک میں اس وقت سیاست کی کوئی سرگرمی نہیں ہو رہی ہے، اور جب سیاست ہوگی تو وہ بھی سیاسی طور پر متحرک نظر آئیں گے۔
فواد چوہدری نے اپنی زندگی کے دیگر پہلوؤں کے بارے میں بھی بات کی، جیسے کہ انہیں سوئمنگ اور جم کرنے کا شوق تھا، مگر اب انہوں نے یہ روٹین چھوڑ دی ہے۔ ڈرائیونگ کا شوق نہ ہونے کے باوجود فواد چوہدری نے کہا کہ انہیں گھومنے کا بہت شوق ہے اور وہ دنیا بھر میں سفر کر چکے ہیں۔
کھانے پینے کے شوقین فواد چوہدری نے بتایا کہ وہ آلو، دال اور گوشت سے بنی غذائیں بڑے شوق سے کھاتے ہیں، مگر خود کھانا پکانے کا تجربہ نہیں رکھتے۔ انہوں نے مزید بتایا کہ سب سے چھوٹی بیٹی کے کہنے پر وہ کوکنگ سیکھنے کا سوچ رہے ہیں۔
پاکستان کے نوجوانوں کے لیے فواد چوہدری کا پیغام تھا کہ وہ مایوس نہ ہوں اور امید کا دامن نہ چھوڑیں۔ انہوں نے کہا کہ مشکل وقت کے چند ماہ یا سال ہیں، لیکن حالات ضرور ٹھیک ہوں گے اور ملک میں بہتری آئے گی۔
