فرانس :شوہر کے خلاف بیوی کو نشہ پلا کر 72 مردوں سے زیادتی کروانے کا مقدمہ
پیرس: فرانس میں ایک دل دہلا دینے والا کیس عدالت میں پہنچ گیا ہے، جہاں ایک خاتون نے اپنے شوہر پر الزام عائد کیا ہے کہ اس نے نشہ آور اشیا دے کر 72 مردوں سے اس کی جنسی زیادتی کروائی۔ غیر ملکی میڈیا کے مطابق، 72 سالہ خاتون نے اپنے ریٹائرڈ شوہر، جو فرانس کی سرکاری پاور یوٹیلٹی کمپنی ای ڈی ایف کا 71 سالہ سابق ملازم ہے، پر سنگین الزامات لگائے ہیں۔
گزشتہ روز عدالت میں ہونے والی سماعت کے دوران، درجنوں خواتین جنہوں نے سیاہ لباس پہن رکھا تھا، حقوقِ نسواں کی تنظیموں کی نمائندگی کرتے ہوئے عدالت کے باہر مظاہرہ کیا۔ مقدمے کا مرکزی ملزم اور آن لائن بھرتی کیے گئے 50 دیگر افراد پر جنوبی شہر ایوگنون میں مقدمہ چلایا جائے گا۔
پولیس کی تحقیقات کے مطابق، متاثرہ خاتون کے ساتھ مجموعی طور پر 72 مردوں نے 92 مرتبہ زیادتی کی، جن میں سے 51 افراد کی شناخت ہو چکی ہے، اور ان کی عمریں 26 سے 74 سال کے درمیان ہیں۔
خاتون کے وکلا کا کہنا ہے کہ ان کی موکلہ کو اتنی زیادہ مقدار میں نشہ آور اشیا دی جاتی تھیں کہ وہ ایک دہائی سے زائد عرصے تک جاری رہنے والے اس استحصال سے مکمل طور پر بے خبر رہی۔
خاتون کے وکیل، اسٹیفن بابونیو، نے عدالت کو بتایا کہ پریذائیڈنگ جج راجر اراٹا نے فیصلہ کیا ہے کہ مقدمے کی تمام سماعتیں کھلی عدالت میں ہوں گی۔ خاتون نے کیس کے اختتام تک مکمل تشہیر کی بھی منظوری دی ہے۔ مقدمے کی سماعت 20 دسمبر تک جاری رہے گی، اور اس کیس کا مقصد عوام کو اس سنگین جرم سے آگاہ کرنا اور متاثرہ خاتون کو انصاف دلانا ہے۔
