باپ کی شادی شدہ بیٹی کو دریائے راوی میں پھینکنے کی کوشش،ڈولفن ٹیم نے ناکام بنا دی
لاہور کے علاقے کٹار بند روڈ پر ایک خوفناک واقعہ اس وقت پیش آیا جب ایک باپ اور اس کے کزن نے اپنی بیٹی کو دریائے راوی میں پھینکنے کی کوشش کی۔ تاہم، ڈولفن اسکواڈ کی فوری مداخلت نے اس افسوسناک حادثے کو روک دیا۔
ڈولفن اسکواڈ کے ترجمان، نعمان شیخ، کے مطابق واقعے کی اطلاع مقامی سکیورٹی گارڈ نے دی تھی، جس نے 15 ہیلپ لائن پر کال کرکے اطلاع دی کہ ایک شخص اپنی بیٹی کو دریائے راوی میں پھینکنے کی کوشش کر رہا ہے۔ اطلاع ملنے پر ڈولفن ٹیم فوراً موقع پر پہنچی اور لڑکی کو بچا لیا۔
تحقیقات کے دوران معلوم ہوا کہ متاثرہ لڑکی، ثانیہ کنول، نے اپنے والد برکت علی اور کزن محمد امین کے خلاف بیان دیا کہ وہ اسے پسند کی شادی کرنے پر سزا دینا چاہتے تھے۔ لڑکی کے والد اور کزن کو موقع پر ہی حراست میں لے لیا گیا اور انہیں تھانہ چوہنگ پولیس کے حوالے کر دیا گیا۔
پولیس نے متاثرہ لڑکی کو بھی اپنی تحویل میں لے کر واقعے کی مکمل تحقیقات کا آغاز کر دیا ہے تاکہ اس بات کا پتہ چلایا جا سکے کہ اس افسوسناک واقعے کے پیچھے اور کیا وجوہات تھیں۔
