جشن آزادی ، واہگہ بارڈر کی تقریب میں عوام کی انٹری بند
واہگہ بارڈر پر یوم آزادی کی پریڈ اور پرچم اتارنے کی تقریب میں شہریوں کے داخلے پر پابندی عائد کردی گئی ہے۔ اس فیصلے کی وجہ واہگہ بارڈر پر جاری اپ گریڈیشن منصوبہ ہے، جس کی وجہ سے اس سال تقریب میں صرف محدود تعداد میں مہمانوں کو شرکت کی اجازت دی جائے گی۔
ذرائع کے مطابق، فروری 2024 میں پنجاب کی نگران حکومت نے واہگہ بارڈر پر باب آزادی کی آرائش، تزئین اور توسیع کا منصوبہ شروع کیا تھا، جو ابھی تکمیل کے مراحل میں ہے۔ اس منصوبے کے تحت باب آزادی کو لاہور کے شاہی قلعہ کے عالمگیری گیٹ کی طرز پر تعمیر کیا جا رہا ہے۔
اسی منصوبے کے تحت پریڈ گراؤنڈ کی توسیع بھی کی جائے گی، جہاں بڑے سائز کی ایل سی ڈیز نصب کی جائیں گی تاکہ لوگ پریڈ کا بہتر نظارہ کر سکیں۔ اپ گریڈیشن کے بعد پریڈ گراؤنڈ میں لوگوں کے بیٹھنے کی گنجائش تقریباً 18 ہزار تک بڑھ جائے گی، جبکہ باب آزادی کی اونچائی تقریباً 120 فٹ ہوگی۔
انتظامیہ نے شہریوں کو آگاہ کرنے کے لیے ایک بینر آویزاں کیا ہے، جس میں بتایا گیا ہے کہ اس سال یوم آزادی کی تقریب میں عام شہریوں کو شرکت کی اجازت نہیں ہوگی۔ اس فیصلے کا مقصد تعمیراتی کام کے دوران شہریوں کی حفاظت کو یقینی بنانا ہے۔
یہ منصوبہ واہگہ بارڈر کو ایک نئی شکل دینے اور وہاں کی سہولیات کو بہتر بنانے کے لیے کیا جا رہا ہے، تاکہ مستقبل میں بڑی تعداد میں لوگوں کو بہتر تجربہ فراہم کیا جا سکے۔
